न्यूजमधेश डेस्क
काठमाडौं,२२ असार । अन्ततः निर्वाचन आयोगलाई साक्षी राखेरै जनता समाजवादी पार्टी(जसपा)का नेताहरूले एकै पार्टीमा नरहने औपचारिक घोषणा गरेका छन् ।
२०७७ वैशाख ११ गते रातारात एकीकृत भएको जसपाका नेता महन्थ ठाकुर र राजेन्द्र महतोको सत्ता मोह तथा उपेन्द्र यादव र डा. बाबुराम भट्टराईको सत्ता विरोधी मोर्चासँगको हिमचिमले पार्टी विभाजित हुने तहमा पुगेको हो । जसपा कानूनतः दुई चिरा हुने गरी निर्वाचन आयोगले प्रक्रिया अघि बढाएको छ ।
मै आधिकारिक हुँ भन्दै मंगलबार निर्वाचन आयोगको शरणमा पुगेका जनता समाजवादी पार्टीका अध्यक्ष महन्थ ठाकुर र उपेन्द्र यादवले अब एउटै दलमा सँगै रहनै नसक्ने स्पष्ट पार्नुभयो । पार्टीको नाम, झण्डा, चुनाव चिन्ह आफूले नेतृत्व गरेको समूहले पाउनुपर्ने जिकिरसहितको पत्रसमेत दुवै पक्षले आयोगलाई बुझाइसकेका छन् ।
केपी शर्मा ओलीको सरकारलाई समर्थन गर्ने ठाकुर पक्षको अडान र विपक्षी मोर्चासँग हातेमालो गर्ने यादव पक्षको अडानले जसपा विभाजनको तहमा पुगेको हो । लुम्बिनी, सुदुरपश्चिम र कर्णाली प्रदेश सरकार जोगाउने र गिराउने खेलमा दुई अध्यक्षको फरक–फरक अभ्यासले विभाजनको रेखा फराकिलो बन्दै गयो ।
एकले अर्को पक्षलाई कारबाही गर्ने लामो सिलसिलापछि अन्ततः दुई पक्षले आफूलाई एकता अघिको राष्ट्रिय जनता पार्टी र संघीय समाजवादी पार्टीकै कित्तामा उभ्याएका छन् । जसपाभित्रकाे यादव समूहले पार्टी एकताकाे लागि पाँचवटा शर्त राख्दा ठाकुर समूह भने अहिलेकाे अवस्थामा छुट्टिनु नै जायज हुने पक्षमा छ । मिलेर बस्न नसक्ने भएपछि छुट्टिनु नै उत्तम हुने ठाकुर पक्षीय नेता केशव झा बताउनुहुन्छ ।
ठाकुर र यादव पक्षले एक ठाउँमा नबस्ने घोषणा गरेसँगै जसपा विवादमा राजनीतिक दलसम्बन्धी ऐन २०७३ को दफा ४४ को उपदफा ६ आकर्षित भएको छ । अब बहुमत सिद्ध पक्षलाई निर्वाचन आयोगले आधिकारिता दिनेछ, जसका लागि आयोगले इजलास गठन गर्ने आयोगका प्रवक्ता राजकुमार श्रेष्ठ बताउनुहुन्छ ।
राजनीतिक दल विभाजन सहज हुने गरी प्रधानमन्त्री ओलीले अध्यादेश ल्याएसँगै २०७७ सालको वैशाखमा एकीकृत बनेका दुई दल त्यति बेला किन जुटे भन्ने औचित्य पुष्टि हुन सकेको छैन । एकताको औचित्य पुष्टि नहुँदै विभाजनमा पुगेका जसपाका नेताहरू पहिचानको नारामा अलापेर मधेशको नाममा राजनीति गरिरहेका छन् ।
मधेशको नाममा खुलेका दलहरू सत्ताको लुछाचुँडीमा फसेर विभाजित हुने श्रृंखला लामो समयदेखि चलिरहेको छ । जसपा विभाजन त्यही श्रृंखलाको निरन्तरता हो ।
