न्यूजमधेश डेस्क
काठमाडौं ,२५ असार। नेकपा एमाले झापाका युवा नेता ज्ञानु प्रसाइको सवारी दुर्घटनामा परेर मृत्यु भएको छ ।
बिर्तामोड नगरपालिकाकी उपप्रमुख पवित्रा महतराका श्रीमान् प्रसाइको आफैले चलाएको बा १६ च ८१८२ नम्बरको कार झापास्थित चारआली–चन्द्रगढी सडकखण्डको देवकोटा चोकमा दुर्घटना भएको र दुर्घटनामा घाइते प्रसाईंको उपचारका क्रममा अस्पतालमा मृत्यु भएको प्रहरीले जनाएको छ ।
प्रसाईं नेकपा एमाले बिर्तामोड नगर कमिटीका अध्यक्ष हुन् ।
झापाको चारआली हुँदै चन्द्रगढी जाने क्रममा देवकोटा चोकमा रहेको देवकोटाको सालिकको कम्पाउण्ड वालमा प्रसाईं सवार कार ठोक्किएको थियो ।
सो क्रममा उनको बायाँ खुट्टामा चोट लाग्नुका साथै शरीरको भित्री भागमा दखल पुगेको थियो ।
दुर्घटनामा परेको कार पनि क्षतिग्रस्त भएको छ ।
