न्यूजमधेश डेस्क
काठमाडौं,२९ असार । नेपाली कांग्रेसका सभापति शेरबहादुर देउवाले पाँच सदस्यीय मन्त्रिमण्डल बनाउने भएका छन् ।
सर्वोच्च अदालतले सोमबार २८ घण्टाभित्र देउवालाई प्रधानमन्त्रीमा नियुक्त गर्न परमादेश जारी गरेको थियो ।
आज मंगलबारनै देउवाले आफू नेतृत्वको मन्त्रिमण्डलमा पाँच जना मन्त्रीलाई नियुक्त गर्ने भएका हुन् । देउवाले सुरुमा सानो आकारको मन्त्रिमण्डल बनाउन लागेका हुन् ।
नयाँ मन्त्रिमण्डलमा माओवादी केन्द्रबाट दुई र नेपाली कांग्रेसबाट दुई जना मन्त्री नियुक्त हुनेछन् । उनले कांग्रेसबाट बालकृष्ण खाँडसहितका नेतालाई आफ्नो मन्त्रिमण्डलमा सहभागी गराउने स्रोतले जानकारी दियो ।
माओवादी केन्द्रबाट जनार्दन शर्मा र पम्फा भुसाल मन्त्री हुने स्रोतको दाबी छ । माओवादी केन्द्रको भागमा ६ मन्त्री र दुई राज्यमन्त्री परेको छ ।
त्यस्तै नेपाली कांग्रेसको भागमा माओवादी केन्द्र र जसपा बाहेकका सबै मन्त्रालय परेका छन् । यता जनता समाजवादी पार्टी जसपा को उपेन्द्र यादव पक्ष केही दिनमा सरकारमा सहभागी हुने भएको छ । यादव पक्षबाट ६ जना मन्त्री हुने भएका छन् ।
स्रोतका अनुसार यादव पक्षबाट सरकारमा सहभागी हुन यादव आफैं, महेन्द्र यादव, राजेन्द्र श्रेष्ठ, मृगेन्द्रसिंह यादव, रामसहाय यादव, इस्तियाक राइ, रेणु यादव तथा प्रदीप यादव मध्येबाट ६ जनालाई साथमा लिएर जाने देखिएका छन् ।
