कमल कुमार मण्डल
सप्तरी, ३० असार । सप्तरीको डाक्नेश्वरी नगरपालिकाको कार्यालयमा जनमत पार्टीले विभिन्न शिर्षकमा सुचना तथा विवरणको प्रतिलिपि माँग गर्दै आज (बुधवार) निवेदन पेश गरिएको छ ।
आर्थिक वर्ष २०७६/२०७७ र २०७७/२०७८ मा नगरपालिकामा भएको विभिन्न कार्यक्रम तथा योजनाको आयोजनाहरुको नाम सहित सञ्चालन हुने स्थानको विवरण, खर्च रकमको श्रोत सहित सुचना तथा विवरणको प्रतिलिपि अध्ययन प्रयोजनकालागि आवश्यक रहेकोले हामीले निवेदन पेश गरिएको जनमत पार्टी डाक्नेश्वरी नगरपालिकाको अध्यक्ष जय प्रकाश मण्डलले बताए ।
आयोजना कार्यान्वयन गर्न अपनाईएको विधि र लाभान्वित जनसंख्याको स्पष्ट विवरण समेत मागँ गरेको निवेदनमा उल्लेख छ । वडाहरुमा भएको आयोजनाका लागत खर्च, आयोजना कार्यन्वयन गरिएको बिधि, सामाजिक विकास खर्च, पूर्वाधार विकास खर्च, वन वातावरण तथा विपद व्यवस्थापन खर्च, सुशासन तथा संस्थागत विकास खर्च सहित सम्पूर्ण विवरणको सूचना उपलब्ध गराउन निवेदनमा लेखिएको छ ।
“नगरपालिकाको आन्तरिक आय श्रोतमा रहेको पोखरी ठेक्काहरुको विवरण, नगरपालिका अन्तर्गत निहित रहेको ऐलानी, सरकारी गौचर जग्गा को वडा स्तरीय विवरण समेत हामीले माँग गरेको” सोही नगरपालिकाका जनमत पार्टीका सचिव पञ्चलाल मण्डल (मधेशी) ले भने– “आर्थिक वर्ष २०७५/०७६ मा तयार पारेको नगरपालिकाको प्रोफाइल, नगरपालिकाको गुरुयोजना र डिपिआरको सम्पूर्ण विवरण सहितको सुचना माँग गरेका छौं ।”
आर्थिक वर्ष २०७८/०७९ को अनुमानित खर्च सहित आयोजनाहरुको नाम समेत उनिहरुले मागँ गरिएको छ ।
