न्यूजमधेश डेस्क
महोत्तरी ,७ श्रावण । नेपाली कांग्रेसका उपसभापति विमलेन्द्र निधिले पार्टीको महाधिवेशन तोकिएको तालिकामा हुने बताउनुभएको छ ।
महोत्तरीको जलेश्वरमा आज महेश्वरप्रसाद सिंह स्मृति भवनको उद्घाटन र प्रजातान्त्रिक योद्धा स्वर्गिय महोश्वरप्रसाद सिंहको सालिक अनावरण गर्दै निधिले शासन सञ्चालनमा कांग्रेसका लागि लोकतन्त्रको कुनै विकल्प नहुने बताउनुभएको हो । नेपाली कांग्रेस महोत्तरीले आफ्नै कार्यालय प्रयोजनका लागि महेश्वरप्रसाद सिंह स्मृति भवन निर्माण गरेको हो ।
उहाँले महोत्तरी पार्टीले नेपाली प्रजातान्त्रिक आन्दोलनका अथक योद्धा स्व सिंहको स्मृति सधैँ ताजा राख्न उहाँको सालिक र भवन निर्माण गरेर स्तूत्य काम गरेको बताउनुभयो । महोत्तरीको सन्दर्भमा स्व सिंह कांग्रेस नेता मात्र नभएर जनमनमा स्थापित नेता रहनुभएको उल्लेख गर्नुभयो ।
विसं २०४८ को आमनिर्वाचनमा तत्कालीन महोत्तरी–३ बाट प्रतिनिधिसभा सदस्य निर्वाचित हुनुभएका स्व सिंह सो लगत्तै सामान्य प्रशासनमन्त्री बन्नुभएको थियो ।
मृत्युपर्यन्त कांग्रेसका केन्द्रीय सदस्य रहनुभएका सिंहको स्मृतिका नेका महोत्तरीले आफ्नो नवनिर्मित कार्यालय भवन नै उहाँको नाउँमा राखेको हो । सालिक अनावरण तथा भवन उद्घाटन समारोह नेका महोत्तरी सभापति महेन्द्रकुमार रायको अध्यक्षतामा सम्पन्न भएको हो ।
