न्यूजमधेश डेस्क
काठमाडौं ,२३ श्रावण । स्वास्थ्य तथा जनसंख्या मन्त्रालयले निकट भविष्यमा सञ्चालन हुने सबै परीक्षा स्थगन गर्न सिफारिस गरेको छ । कोरोना संक्रमण फैलने क्रम बढेपछि सम्भावित जोखिम कम गर्ने उद्देश्यले सबै परीक्षा स्थगित गर्न शिक्षा मन्त्रालय र कोभिड–१९ संकट व्यवस्थापन केन्द्र (सीसीएमसी)लाई सिफारिस गरिएको स्वास्थ्य राज्यमन्त्री उमेश श्रेष्ठले जानकारी दिए ।
मुख्यतः निकट भविष्यमा कक्षा १२ सहित स्नातक र स्नातकोत्तर तहका विभिन्न परीक्षा सञ्चालन गर्ने तयारी थियो । कोरोना संक्रमण बढ्दै गएपछि जोखिमलाई मध्यनजर गर्दै शिक्षा मन्त्रालय र कोभिड–१९ संकट व्यवस्थापन केन्द्रलाई परीक्षा स्थगन गर्न सिफारिस गरिएको हो ।
– विद्यार्थी अन्योलमा
स्वास्थ्य तथा जनसंख्या राज्यमन्त्री श्रेष्ठले जोखिमको अवस्थामा परीक्षा सञ्चालन गर्न नसकिने बताए । उनले कोभिड–१९ संक्रमण फैलँदै गएको विद्यमान परिस्थितिमा ४ लाख विद्यार्थीको जीवनरक्षाप्रति संवेदनशील भएर सो निर्णय गरिएको बताए । स्वास्थ्य मन्त्रालयले पटकपटक जनस्वास्थ्यको मापदण्ड कार्यान्वयन नभएको भन्दै प्रश्न उठाउने गरेको छ । स्वास्थ्य मन्त्रालयका प्रवक्ता डा. कृष्ण पौडेलले कोरोना जोखिम न्यूनीकरणका लागि भौतिक दूरी कायम गर्दै मास्कको समुचित प्रयोग अनिवार्य भएको बताए ।
बिहीबार संसद्को शिक्षा तथा स्वास्थ्य समितिले पनि कक्षा १२ को परीक्षा सञ्चालन सन्दर्भमा गम्भीर हुन सरकारलाई निर्देशन दिएको थियो । कक्षा १२ को परीक्षा साउन ३१ गतेबाट सुरु हुने तालिका सार्वजनिक भइसकेको छ । यस्तै, स्नातक तहका विद्यार्थीहरू पनि परीक्षाको पर्खाइमा छन् ।
परीक्षा स्थगितको निर्णय राष्ट्रिय परीक्षा बोर्डले गर्नुपर्नेहुन्छ । बोर्डको बैठक आज शनिबार बोलाइएको छ । बोर्डले भौतिक दूरी कायम गरी एउटा कक्षामा कम्तीमा २५ जना मात्रै विद्यार्थी राख्नेगरी परीक्षा सञ्चालनको तयारी थालेको थियो ।
परीक्षा आन्तरिक मूल्यांकनकै आधारमा हुने वा भौतिक उपस्थितिसहित सञ्चालन हुने भन्ने निक्र्योल नहुँदा विद्यार्थी मारमा परेका छन् ।
घटेन मृत्यु दर
यस्तै, शुक्रबार देशभर ३ हजार ९ सय ३८ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार पछिल्लो २४ घण्टामा देशभरका प्रयोगशालामा गरिएको १८ हजार ४ सय ८ जनाको पीसीआर र एन्टिजेन परीक्षणमा ३ हजार ९ सय ३८ जनामा संक्रमण पुष्टि भएको हो । मृत्यु हुने दरमा कमी आउन सकेको छैन । पछिल्लो २४ घण्टामा ३७ जना संक्रमितको मृत्यु भएको छ ।
शुक्रबार ११ हजार ८ सय ७० जनाको पीसीआर परीक्षण गर्दा ३ हजार ७ र र ६ हजार ५ सय ३८ जनाको एन्टिजेन परीक्षण गर्दा ९ सय ३१ जनामा संक्रमण पुष्टि भएको स्वास्थ्य मन्त्रालयले बताएको छ । देशभर शुक्रबार थप २ हजार १२ जना संक्रमित निको भई डिस्चार्ज भएका छन् ।
हाल देशभरका अस्पतालमा ७ सय १३ जना आईसीयूमा र १ सय ५८ जनाको भेन्टिलेटरमा उपचाररत रहेका छन् । देशभर ३ सय ७५ जना क्वारेन्टाइनमा रहेका छन् । संक्रमण जोखिम नटरे पनि केही दिनयता जनस्वास्थ्यका मापदण्ड कार्यान्वयनमा आउन नसकेको देखिएको छ ।
