न्यूजमधेश डेस्क
जनकपुरधाम ,१६ भाद्र । लोकतान्त्रिक समाजवादी पार्टी नेपालका अध्यक्ष महन्थ ठाकुरले जसपा भन्दा आफुहरु मजबुत रहेको दाबी गरिएको छ ।
बुधबार जनकपुर विमानस्थलमा संचारकर्मीहरु संग कुराकानी गर्दै लोसपाका अध्यक्ष ठाकुरले यस्तो दावी गरेका हुन् । अध्यक्ष ठाकुरले भने– ‘हाम्रो बारेमा कसैले विश्लेषण गरेर हुँदैन, जसपाभन्दा हामी स्ट्रंग छौं ।’
लोसपाका अध्यक्ष महन्थ ठाकुर, वरिष्ठ नेता सरदसिंह भण्डारी र राजेन्द्र महतो एकैपटक जनकपुरधाम आएका छन् ।
उनीहरुको आगमनलाई निकै महत्वका साथ हेरिएको छ । बुधवार जसपाका जनप्रतिनिधि तथा प्रदेशसभा सदस्यहरु नयाँ दल रोज्नका लागि निर्वाचन कार्यालय जाने समय लोसपाका ३ वरिष्ठ नेताहरुको आगमनलाई अर्थपूर्णरुपमा हेरिएको छ ।
यता लोसपाले जनकपुरधाममा शक्ति प्रर्दशन समेत गरेको छ भने पार्टीका तिनै वरिष्ठ नेता जनकपुरधाममा भव्य स्वागत गरिएको छ । प्रदेशका सांसदहरुसंग पार्टीको विषयको बारेमा आउने चारदिन सम्म छलफल गरिने वताइएको छ ।
