न्यूजमधेश डेस्क
राजविराज,२९ भाद्र । प्रदेश २ का मुख्यमन्त्री लालबाबु राउतको फोटो लगाइएको होर्डिङ् बोर्ड जलाएको भन्दै एक जनालाई प्रहरीले सप्तरीबाट पक्राउ गरेको छ ।
हनुमाननगर कंकालिनी नगरपालिका १ भारदहस्थित कंकालिनी मन्दिर प्राङणमा प्रदेश सरकारको स्वच्छता अभियान सम्बन्धी होर्डिङ बोर्ड जलाएको भन्दै राष्ट्रिय एकता अभियानकी उपाध्यक्ष सुनिता साहलाई पक्राउ गरिएको प्रहरीले जनाएको छ।
इलाका प्रहरी कार्यालय भारदहको टोलीले साहलाई पक्राउ गरेको सप्तरी प्रहरीका प्रबक्ता माधव प्रसाद काफ्लेले जानकारी दिए ।
उनका अनुसार पक्राउ परेकी साहलाई जिल्ला प्रहरी कार्यालय, राजविराज ल्याउने तयारी भइरहेको छ ।मन्दिर प्राङ्णभित्र होर्डिङ् बोर्ड लगाएर मन्दिरको सौन्दर्यतामा असर पारेकाले आफूहरुले जलाएको अभियानकी उपाध्यक्ष साहले बताएकी छन् ।
यसअघि जनकुरधामस्थित जानकी मन्दिरमा लगाइएको होर्डिङ बोर्डहरु समेत स्थानीय केहि युवाले भत्काइदिएका थिए ।
