न्यूजमधेश डेस्क
काठमाडौं,२३ असोज । अफगानिस्तानको कुन्दुज शहरमा रहेको मस्जिदमा आत्मघाती बम आक्रमणमा कम्तीमा ५० जनाको ज्यान गएको छ । अमेरिकी सैनिकले अफगानिस्तान छोडेयता भएको यो सबैभन्दा ठूलो आक्रमण हो ।
सइद अबाद मस्जिदमा बम आक्रमणमा मारिएकाहरुको शव छरिएको अवस्थामा देखिएको स्थानीय अधिकारीले अन्तर्राष्ट्रिय सञ्चारमाध्यमलाई जानकारी दिएका छन् । अल्पसंख्यक शिया मुसलमान समुदायको सो मस्जिदमा आक्रमण भएको हो ।
उत्तरी शहर कुन्दुजमा भएको सो आक्रमणमा एक सय भन्दा बढी मानिस घाइते भएका छन् । इस्लामिक स्टेटले आक्रमणमा आफ्नो संलग्नता रहेको बताएको छ । सुन्नी मुसलमान अतिवादी समूहले शिया समुदायमाथि आक्रमण गर्ने गरेको छ ।
इस्लामिक स्टेट (आइएस) को अफगानिस्तानको समूह आइएस–के ले तालिबान सत्ताको विरोध गर्दै आएको छ । उसले लगातार जस्तो हिंसात्मक आक्रमण गर्ने गरेको हो । उसले विशेष गरी अफगानिस्तानको पूर्वी क्षेत्रमा बम आक्रमण गर्दै आएको छ ।
शुक्रबारको प्रार्थनाका लागि श्रद्धालु मस्जिदभित्र जम्मा भएका बेला आत्मघाती आक्रमणकारीले आफैलाई बिस्फोट गराएको जनाइएको छ ।
आक्रमण भएका बेला ३०० भन्दा बढी मानिस मस्जिदमा रहेको स्थानीय सुरक्षा अधिकारीलाई उद्धृत गर्दै अफगानिस्तानको टोलो न्यूजले जनाएको छ । मृत्यु हुनेको संख्या अझै बढ्न सक्ने जनाइएको छ ।
यो हप्ता अफगानिस्तानमा भएको तीन ठूला आक्रमण मध्ये शुक्रबारको आक्रमण भयानक रहेको संयुक्त राष्ट्रसंघले जनाएको छ ।
यसअघि आइतबार काबुलमा मस्जिद नजिकै भएको आक्रमणमा सातजनाको ज्यान गएको थियो । यस्तै बुधबार खोस्ट शहरमा रहेको मदर्सामा भएको आक्रमणमा भएको थियो ।
अमेरिकी सैनिक फिर्ता भएसँगै अफगानिस्तानमा अहिले तालिबानको शासन छ । तालिबानले अगस्ट १५ मा काबुल नियन्त्रणमा लिएको थियो । अमेरिकी सैनिक अगस्टको अन्तिममा स्वदेश फर्किएका थिए ।एजेन्सी
