न्यूजमधेश डेस्क
झापा ,२४ असोज । भारतको विभिन्न सहरबाट १८ वर्षमुनिका ५ बालबालिकाको उद्धार गरिएको छ ।
भारतको कलकत्ताबाट ति पाँच जना नेपाली बालबालिकाको उद्धार गरी शनिबार काकरभिट्टा ल्याइएको छ । विश्व सेवा विस्तार संस्थाका शाखा कार्यालय काकरभिट्टाले दुई बालिका र तीन बालकलाई उद्दार गरी शनिबार काकरभिट्टा ल्याइएको हो ।
उद्धार गरिएका बालक धनुषा , रोल्पा र पाँचथरका तथा बालिकाहरु कास्की र मकवानपुरका रहेका छन् ।
विश्व सेवा विस्तार संस्थाका शाखा कार्यालय काकरभिट्टाका फिल्ड इन्चार्ज कुमार बस्नेतले भारतमा उद्धार गरेर बालगृहमा राखिएका नेपाली बालबालिकालाई काकरभिट्टा ल्याइएको जानकारी दिएका हुन्।
भारतको कलकत्तामा विभिन्न होटल र कारखानामा काम गर्दै आएका बालबालिकालाई प्रहरीले नियन्त्रणमा लिएर बाल गृह र बालिका गृहमा राखेका थियो ।
ती बालबालिकालाई विश्व सेवा विस्तार संस्था काकरभिट्टाको पहलमा भारतीय प्रहरी, नेपाली महावाणिज्य दूतावास कलकत्ता ,नेपाल प्रहरीसँगको सहकार्यमा उद्धार गरि नेपाल ल्याइएको हो ।
उद्धार गरिएका सबैलाई शनिबार नै परिवारको जिम्मा लगाइएको छ ।
