संजिप मण्डल
जनकपुरधाम,९ मंसिर । भारतबाट भन्सार छली नेपाल भित्र्याएको मालसामान शसस्त्र प्रहरीले धनुषाको बिदेह नगरपालिका-९ स्थित खरियानीबाट ठूलो परिमाणमा बरामद गरेको छ ।
बरामद गरेको कपडाको भन्सार मुल्य ७ लाख ६२ हजार ७ सय साठी रुपैया रहेको शसस्त्र प्रहरीले जनाएको छ । शसस्त्र प्रहरी बल नेपाल नम्बर २ छिन्नमस्ता बाहिनी मुख्यालय बर्दिबासबाट खटिएको स्क्वार्ड टोली, शसस्त्र प्रहरी नं. ८ गण धनुषा र बीओपी ठाढी झिझा(धनौजी)बाट संयुक्त रुपमा खटिएको टोलीले उक्त परिमाणका कपडा पक्राउ गरेको हो ।
केही दिन अघि मात्रै धनुषाको बिभिन्न नाकाहरुबाट ब्यापक तस्करी भइ रहेको भन्ने स्थलगत रिपोर्ट दृष्टि साप्ताहिक र दृष्टि न्युज डटकममा छापिएपछि शसस्त्र प्रहरी चासो देखाएको थियो । बरामद गरिएको मालसामान बैतुल्लाह भन्ने ब्यापारीको रहेको बुझिएको छ ।
बीओपी ठाढी झिझा(धनौजी) मातहतमा पर्ने फरवार्ड बेस इटहर्बादेखि करीब ५ सय मिटर मात्र टाढा रहेको छ । जहाँबाट बुद्धबार राती १ बजे अबैध कपडा प्रहरीले बरामद गरेको छ । यति नजीक तस्करी गरी ल्याएका कपडा राख्नाले एफओबी इटहर्बाका इन्चार्ज परशुराम उराबको प्रत्यक्ष संलग्नता रहेको शसस्त्र प्रहरी श्रोतको दाबी छ ।
खरियानी नाकाबाट सम्तुल्लाह, बैतुल्लाह, धर्मेन्द्र, कयुब, तुलसी लगायतका तस्करहरुले भारतबाट राती लत्ताकपडा, हार्डबेयर, इलेक्ट्रोनिक्स समान, तेल, चिनि, चप्पल, गाई गोरु लगायतका मालसामान तथा चौपाया नेपाल ल्याइने गरेको छ । उक्त नाकाबाट तस्करीको लाईन दिनेहरुमा रेल्बे बेस क्याम्प, बैदेहिका इन्सपेक्टर सरोज आचार्य र एफओबी इटहर्बाका इन्चार्ज परशुराम उराब रहेको छ ।
हाल केही दिनदेखि बन्द तस्करीको लाइन बन्द रहे पनि मंसिर महिनाको रकमसमेत इन्पेक्टर आचार्य र सइ उराबले आफनै रिस्कमा उठाई सकेका छन् । जिल्लाले लाईन नखोले पनि बिओपी इन्चार्जहरु आफनै रिस्कमा इनर्बा, जटही र फुलगामाबाट अहिले पनि सेटिङ्गमा तस्करी गराइरहेको छ । बोर्डर आउट पोष्ट फुलगामाका इन्पेक्टर बाबुराम लम्सालले उमेश साह, सुल्तान मियाँ, बिन्देश्वर नायक, फेकन लगायतका ब्यापारीहरुलाई लाईन दिएका छन् ।
यिनीहरु नेपालबाट मुख्यतः रक्सी, स्याउ, कलगेट तुथ पेस्ट, फेयर एण्ड लबली, लगायतका मालसामान भारत पठाउने गरिएको छ । केही दिन अघि मात्रै नेपालबाट ड्रोन क्यामरा भारत लैजाँदै गर्दा छिन्नमस्ता बाहिनीका टोलीले पक्राउ गरी भन्सार पठाएका थिए ।
त्यस्तै जिल्ला प्रहरी कार्यालय धनुषाका टोलीले गएराती ४९ बोरा मटर र १३ वटा मोटर साईकलसहित भन्सार बुझाएका थिए । चोरी तस्करी नियन्त्रण गर्न शसस्त्र प्रहरी धनुषाका एसपी नरेन्द्र सेनले मातहतका बिओपी तथा बेसहरुलाई कडाइका साथ चोरी निकासी पैठारी बन्द गर्न निर्देशन दिएको छ ।
गणबाट असइ श्रवण कुमार मण्डलको कमाण्डमा खटिएका ८ जनाको टोली र बीओपी ठाढी झिझा(धनौजी)बाट इन्सपेक्टर रवि बस्नेतको कमाण्डमा ७ जनाको टोलीले १४ पोका बरामद गरेको थियो ।
माओवादी केन्द्रकाे राष्ट्रिय सम्मेलन : प्रवेश शुल्क २ हजार रुपैयाँ ताेकियाे
आज कक्षा १२ को नतिजा सार्वजनिक गर्ने तयारी
