न्यूजमधेश डेस्क
जनकपुरधाम,१२ मंसिर।पुर्वमन्त्री एवम् लोकतान्त्रिक समाजवादी पार्टी (लोसपा)का नेता उमाकशंकर अरगरियाले उपेन्द्र यादवले मधेशको भोट बेचेको आरोप लगाएका छन्।
मधेशका जनताले आफ्ना प्रत्यक्ष उम्मेदबारलाई मत दिएर जिताए पनि समानुपातिकका लागि दिएको मत उपेन्द्रले बेचेको उनले बताए।
शनिबार लोसपा कमला नगरपालिकाका अध्यक्ष मनिक लाल मण्डलको अध्यक्षतामा सघारामा आयोजित पार्टी प्रवेश कार्यक्रमलाई सम्बोधन गर्दै प्रतिनिधी सभा सदस्य समेत रहेका अरगरियाले मधेशको समानुपातिक भोटलाई काठमाडौं गएर उपेन्द्रले बेचेको बताए ।
उनले भने ‘भोट हाम्रो धनुषा जिल्लाको। तर सांसद कसलाई बनायो ? राजेन्द्र श्रेष्ठ, रेणुका गुरुङ्ग, लिला सिटौलालाई’ उनले भने, ‘मधेशको भोट बेचिएको हो कि होइन् ?’
उनले प्रदेश २ मा दुई तिहाई बहुमत रहेको भन्दै २ नम्बरिया छाप हटाएर मधेश नामाकरण गर्न आग्रह गरे ।
उक्त कार्यक्रममा एकीकृत समाजवाद पार्टी ,नेपाली कांग्रेस छाडेर करिब एक सय भन्दा बढी जना लोकतान्त्रिक समाजवादी पार्टीमा प्रवेश गरेका हुन।
नव प्रवेशहरुलाई दोसल्ला ओढाएर नेता अरगरियाले पार्टीमा स्वागत गरेको हो।
सो कार्यक्रममा लोसपा धनुषा अध्यक्ष प्रमोद यादव,संजय चौधरी ,संजय साह,जनकपुरधाम उपमहानगरपालिकाका उपमेयर रिता मिश्र ,पार्टीका जनकनन्दिनी गाउँपालिका अध्यक्ष सुनिल मण्डल ,युवा नेता रामकुमार यादवलगाइत स्थानीय नेता कार्यकर्ताहरुको समेत उपस्थिति रहेको थिए।
