जनकपुरधाम । मधेश प्रदेशका मुख्यमन्त्री लालबाबु राउतले पुरुषको अधिकार पनि हनन हुन थालेको बताएका छन् ।
राष्ट्रिय मानवअधिकार आयाेगले शुक्रबारदेखि जनकपुरधाममा आयोजना गरेको मधेश प्रदेश स्तरीय मानव अधिकार रक्षकको सम्मेलनलाई उद्घाटन गर्दै मुख्यमन्त्री राउतले पछिल्लो समयमा पुरुषको अधिकार हनन हुन थालेको बताएका हुन् ।
‘महिला हिंसा घरमै भइरहेकाे छ, तर वैदेशिक राेजगारका कारण पुरूषहरू पनि हिंसामा परिरहेका छन्’ मुख्यमन्त्री राउतले भने, ‘सरकार भएपछि त्यसतर्फ पनि सोच्नुपर्छ । कसैको अधिकार हनन हुनुभएन ।’
उनले चाहिने भन्दा पनि बढी अधिकारको प्रयोग कसैले नगर्न पाउनेतर्फ राज्यले सोच्नुपर्ने बताए ।
आफ्नो प्रहरी नहुदा मानवअधिकार उल्लंघनका घटनालाई नियन्त्रण गर्न नसकिएको उनले बताए ।
मुख्यमन्त्री राउतले आफ्नो अधिकारको खोजी गर्दा अरुको हनन गर्न नहुने बताए ।
कार्यक्रममा लोकतान्त्रिक समाजवादी पार्टीका सांसद परमेश्वर साहले राज्यले सबै नागरिकलाई समान अधिकार नदिएसम्म मानवअधिकार उल्लंघनका घट्ना भइरहने बताए ।
