न्यूजमधेश डेस्क
जनकपुरधाम, २५ चैत । डा.सीके राउत नेतृत्वको जनमत पार्टीले धनुषा जिल्लाको सबैला नगरपालिकाको मेयरमा बीपी साहलाई उम्मेदवार बनाएको छ ।

जनमत पार्टी सबैला नगर समितिले साहलाई सर्वसम्मत रुपमा मेयरमा उठाउने निर्णय गरेपछि डा.राउतले स्वयम् आफ्नो फेसबुक पेजबाट साहको उम्मेदवारी घोषणा गरेका हुन् ।

३१ वर्षीय बीपी साह त्रिभुवन विश्विद्यालय केन्द्रीय विभागबाट एमए र नेपाल ल क्याम्पस काठमाडौंबाट एलएलबी गरेका हुन् । सँगै उनले राजनीतिशास्त्रमा बीए पनि गरेका छन् ।

विगत १५ वर्षदेखि पत्रकारिता गरेका साह झण्डै १२ वर्ष काठमाडौंमा बसेर संघीय संसदको संसदीय एवं राजनीतिक पत्रकारिता गरेका हुन् ।

रेडियो नेपाल, भारतीय टेलिभिजनलगायत कयौं मिडियामा काम गरेका साहले नेपालमा दर्ता हुने पहिलो अनलाइन न्यूजपोर्टल हुलाकी न्यूज डटकमका सम्पादक पनि हुन् ।

सबैला नगरपालिका वडा नम्बर १२ रघुनाथपुर घर भएका साह किसान परिवारमा जन्मेका हुन् । तीन भाई बहिनी मध्ये सबभन्दा कान्छो बीपी साह सुरुवाती कालदेखि नै सामाजिक कार्यमा सक्रिय हुँदै आएका छन् । रघुनाथपुर सेवा समाजका अध्यक्षसमेत रहेका साहले न्यायका लागि भएका विभिन्न आन्दोलनमा सक्रिय भएर पटक पटक प्रहरी हिरासतमा पुगेका हुन् ।

आर्थिक रुपमा विभिन्नहरुका लागि सामाजिक संस्थामार्फत उनले सहयोग गर्दै आएका छन् । प्रहरी हिरातमा संकास्पद मृत्यु भएका शम्भू सादा र अस्पतालको बेडमा छटपटिएर मृत्यु भएका राजु सादालगायतको घटनामा दोषीलाई कारवाही गराउन भएको आन्दोलनमा उनी नेतृत्वदायी भूमिकामा थिए ।

निडर स्वभाव र सहयोगी भावनाका साह जनमत पार्टीमा स्थापना कालदेखि नै आवद्ध छन् । समाज परिवर्तन गर्ने दृष्टिकोण र समाजसुधारको अभियानमा उनी अगाडि छन् ।

धनुषा जिल्लाको सबैला नगरपालिका शिक्षित एवं व्यवसायिक नगरी भएकोले डा.सीके राउतले शिक्षित एवं स्वच्छ छबीका युवा बीपी साहलाई उम्मेदवार बनाएका हुन् । आन्तरिक सवेक्षणले बीपी साहले मेयरमा चुनाव जित्ने देखाएपछि जनमत पार्टीले उनलाई उम्मेदवार बनाएको दाबी गरिएको छ ।


हाम्रो बारेमा

ताजा र खोजमूलक समाचार, विचार, विश्लेषण र अन्तर्वार्ता निरन्तर सम्प्रेषण गर्दै जानेछ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा कहिल्यै कसैसँग सम्झौता गर्ने छैन ।  अनलाइन पत्रिकाको रुपमा निरन्तर सुचना प्रवाहमा जागरुक रहन्छ ।

हाम्रो समुह

संचालक  : मनोज कुमार मोरबैता
सम्पादक : मनोज बनैता

वरिष्ठ सल्लाहकार : बिपी साह
वरिष्ठ  सल्लाहकार : श्रवण देव

वरिष्ठ  सल्लाहकार : मोहन सिंह
वरिष्ठ  सल्लाहकार  : सन्तोष जादब

सम्पर्क

श्री मधेश न्यूज नेटवर्क प्रा.लि.

जनकपुरधाम , धनुषा ( नेपाल )

सम्पर्क : ९८४४५२०३२० ,९८०७७४९०००
ईमेल : [email protected] , [email protected]

Copyright © 2018-2022 News Madhesh