न्यूजमधेश डेस्क
जनकपुरधाम ,२१ बैशाख । डा सीके राउत नेतृत्वको जनमत पार्टीका जनकनन्दिनी गाउँपालिका अध्यक्ष पदका उम्मेदवार नविन पण्डितले भ्रष्टाचार मुक्त पालिका बनाउने उद्देश्य बोकेर उम्मेदवारी दिएको बताए ।
उनले भ्रष्ट्राचारले देश सखाप भएकाले त्यसको न्युनिकरणलाई आफ्नो उम्मेदवारी रहेको बताए । उनले जनकनन्दिनीबासीको माया र मागका कारण आफूलाई पार्टीले उम्मेदवार बताएको बताए ।
पण्डित जनकनन्दिनीलाई समृद्ध बनाउनका लागि आफू सदैव लाग्ने र त्यसका लागि विज्ञहरुको सल्लाहमा योजनाहरु ल्याउने बताए ।
‘जनकनन्दिनीको समृद्धि, विकास र भ्रष्टाचारमुक्त स्थानीय तह बनाउन जनकनन्दिनीको जनताको माग र मायाका कारण मलाई पार्टीले उम्मेदवार बनाएको हो ।’
उनले भने, ‘यहाँका युवा, महिला र जनताले मलाई माया र विश्वास गरेर भ्रष्टाचारमुक्त जनकनन्दिनी बनाउन गरेको आग्रहले मैले उम्मेदवारी दिएको हुँ ।’
पण्डितले मतदाताको विश्वास नतोड्ने प्रतिवद्धता व्यक्त गरे । उनले भने ‘मैले र मेरो परिवारले बेइमानी गरेर एक कौडी पनि खाएका छैनौ । म मेरा मतदाताहरूको विश्वास तोड्दिन र कसैलाई बेइमानी पनि गर्न दिनेछैन ।’
जनकनन्दिनी गाउँपालिकामा स्वास्थ्य क्षेत्र निकै कमजोर रहेकोले आफू विजयी भएपछि अस्पतालमा विशेषज्ञ सेवा सहितको सुविधायुक्त बनाउने बताए । जनकनन्दिनी गाउँपालिकाका ६ वटै वडा समेट्नेगरी चक्रपथ निर्माण गर्ने, घर घरमा एक जनालाई रोजगारी दिने योजनाहरु रहेको उनले बताए ।
