न्यूजमधेश डेस्क
काठमाडौं ,१७ जेष्ठ । जेठदेखि सरकारले हप्तामा दुई दिन बिदाको निर्णय कार्यान्वायनमा लगिसक्यो । तर, सरकारका कतिपय कार्यालयले भने यो निर्णय अझै पालना गरेका छैनन् ।
सरकारको निर्णय पालना नगर्ने एक निकाय हो अख्तियार दुरुपयोग अनुसन्धान आयोग । आयोगले आइतबार पनि आफ्ना कर्मचारीलाई कार्यालय बोलाउने गरेको छ । आयोगमा अनुसन्धानका काम धेरै पेन्डिङ भएको भन्दै प्रमुख आयुक्त प्रेम कुमार राईले आइतबार पनि कार्यालय खोल्ने निर्णय गरेका छन् ।
आइतबार पनि आयोग खोल्नुको अर्काे कारण सरकारले आयोगका कर्मचारीलाई दिएको प्रोत्साहन भत्ता पनि हो ।
सरकारसँग अतिरिक्त भत्ता लिएर पाँच दिनमात्र काम गर्न नहुने भन्दै यसरी आइतबार पनि कार्यालय खोलेर काम भइरहेको छ । गत फागुनदेखि आयोगका कर्मचारीले भत्ता पाइरहेका छन् ।
त्यसो त पछिल्लो समय आयोगले भ्रष्टाचारका मुद्दामा छानबिनलाई तिव्रता दिएको छ । आयोगले हरेक हप्ता जसो भ्रष्टाचारका मुद्दा दायर गर्दै आएको छ । केही ठूला मुद्दाको समेत तयारी भइरहेको स्रोत बताउँछ । पाँच दिन काम गरेर नभ्याइने भएकाले आइतबार पनि आयोगले कार्यालय खोल्ने निर्णय गरेको हो ।
हप्तामा दुई दिन बिदाले अन्य केही सरकारी कार्यालयमा पनि समस्या भएको छ । अत्याधिक मुद्दाको चाप रहेको अदालतमा यसको समस्या छ । जसकारण बरु आइतबारका लागि अतिरिक्त भत्ता दिएर कार्यालय खोल्नेबारे सर्वाेच्च अदालतमा छलफल भइरहेको स्रोत बताउँछ ।
त्रिपुरेश्वरमा सेवाग्राहीको अत्याधिक भिड रहेको राहदानी विभागले पनि आइतबार कार्यालय खोल्ने निर्णय गरिसकेको छ । आइतबार खटिएवापत थप सुविधा दिने गरी आइतबार पनि खोल्ने निर्णय गरिएको हो । पेट्रोलियमको खपत कम र अन्य देशको जस्तै दुई दिन बिदाको प्रणाली परीक्षण गर्न यस्तो निर्णय गरिएको छ । यसको मिश्रित प्रभाव देखिएको छ ।
