न्यूजमधेश डेस्क
सप्तरी,२६ जेष्ठ । सप्तरीको बलान बिहुल गाउँपालिका ले पहिलो बैठकद्वारा विभिन्न निर्णयहरु लिएका छन् । पालिका अध्यक्ष खेमचन्द्र यादवको अध्यक्षतामा बुधबार बसेको कार्यपालिकाको बैठकले सो निर्णयहरु गरेका हुन् ।
बैठकमा कभर्ड हल सम्बन्धि पुर्वका नेतृत्वले गरेको निर्णयलाई बदर गरिए संगै नयाँ निर्णय लिईएको छ । निर्णय अनुसार कभर्ड हल पालिकाको नवनिर्मित भवनको उत्तरपट्टी र बलानको कुलो पैनी देखि दक्षिणमा रहेको खाली जग्गामा बनाउने भएको छ त्यसको लागि प्रदेश सरकारलाई पत्र पठाउने निर्णय गरिएको छ ।
प्रधानमन्त्री स्वरोजगार योजनालाई सम्बन्धित वडा अध्यक्षको नेतृत्व तथा कामदारहरु बाट नै समिति बनाई कार्य संचालन गर्ने निर्णय भएको छ। सवारी साधनको विषयमा आवस्यकता अनुसार कर्मचारीलाई मोटरसाइकल किन्ने निर्णय भएको छ ।
त्यसैगरी उपाध्यक्ष रेणु यादवको संयोजकत्वमा ६ सदस्य अनुगमन समिति निर्माण गर्ने निर्णय भएको छ । विधालयको सवालमा ब्यवस्थापन समिति अषाढ मसान्तसम्म बनाउने तथा सहमति नजुटेको खन्डमा चुनावी प्रक्रियामा जाने निर्णय गरिएको छ ।
दलित आवासका लागि प्रत्येक वडाबाट नामावली संकलन गर्ने निर्णय भएको छ ।
कार्यपालिका सदस्य सुलेखा देवी यादवको नेतृत्वमा उक्त नामावली संकलन काम हुने जनाएको छ।
त्यस्तै कृषि भेटेनरी प्रयोगशालाको निर्माण वडा १ स्थित एलानी जग्गामा गर्ने निर्णय भएको छ । ब्यक्तिगत घटना दर्ता र सिफारिस दस्तुर निशुल्क गर्न राजस्व परामर्श समिति हुँदै गाउँसभामा पेशगर्ने लगायतका निर्णयहरु गरिएका छन् ।
