न्यूजमधेश डेस्क
सर्लाही ,५ असार।सर्लाहीको धनकौलमा गएराति कार दुर्घटना हुँदा चार वर्षीय बालकको मृत्यु भएको छ। दुर्घटनामा अन्य सात जना घाइते भएका छन्।
धनकौल गाउँपालिका–५, छठीघाट पुलमा शनिबार मध्यराति नौ जना सबार बीआर ०५ एआर ५१३७ नम्वरको कार दुर्घटनामा परेको हो।
सर्लाहीका छतौनाबाट छठियारको भोज खाएर रौतहटको वृन्दावनको हरैयातर्फ फर्किदै गरेका यात्रुहरु सवार कार शनिबार राती १ बजे दुर्घटनामा परेको प्रहरीले जनाएको छ।
दुर्घटनामा रौतहटको वृन्दावन नगरपालिका–४ हरैया निवासी शुभलाल यादवका छोरा ४ वर्षीय गम्भीर यादवको घटनास्थलमै मृत्यु भएको इलाका प्रहरी कार्यालय बरहथवाका प्रहरी निरीक्षक चन्देश्वर यादवले जानकारी दिए।
घाइतेमध्ये ७० वर्षीय महेन्द्र रायको अवस्था गम्भीर छ। घाइते सबैको अहिले बरहथवाका स्थानीय क्लिनिकमा उपचार भइएको छ।
दुर्घटनापछि कारका चालक फरार भएकाले उनको खोजी भइरहेको यादवले जानकारी दिए।
