न्यूजमधेश डेस्क
सिरहा ,१३ असार। सिरहा नगरपालिकाका नगरप्रमुख डा. नविन यादवले विद्यालयमा पसेर जब विद्यार्थीहरुको कपाल काटिएपछी चौतर्फी आलोचना हुन थालेको छ ।
नगर प्रमुखमा निर्वाचित भएपछि नगर प्रमुख यादवले जनभावनाको काम गर्न चाहेपनि गलत सल्लाहकारको पछि लागेर जनभावना विपरित कार्य गरेको भन्दै चौतर्फी आलोचना भएको छ ।
समुदायिक विद्यालयमा अध्ययन अध्ययापनको लागि जाने गरेका गरिब, निमुखा बालबालिकाहरुलाई कुनै पूर्व सूचना नै नदिएर एकाएक स्कूलभित्र पसेर कपाल काटिदिएपछि उनीहरुको मानसिक स्थितिमा गम्भिर असर पर्न सकेको हुनुपर्ने बालविज्ञहरु बताउँछन् ।
आईतबार सिरहा नगरपालिका वडा नम्बर ११ भलुवाहस्थित रहेको समुदायिक विद्यालयमा प्रायः सबै बालकहरुको कपालमा कैँचाी चलाएका छन् । उनीहरुलाई यस्तो कपाल नराख्न सुझाव वा स्कूल प्रशासनलाई निर्देशन दिई समय दिनुको साटो एकाएक स्कूलमा हजाम लिएर पसेका मेयरले ओभर शोअफ गरेपछि उनको आलोचना भएको छ ।
नगर प्रमुख जस्तो सार्वजनिक पदधारी व्यक्तिले समुदायिक विद्यालयमा पढने ती बालकहरुलाई बिना कुनै पूर्व निर्देशनको एक्कासी स्कूलभित्र पसेर कपाल काटेपछि कच्चा उमेरका उनीहरुमा मानसिक स्थितिको असर हुन सक्ने अनुमान गरिएको छ ।
एक प्रकारले ती बालकहरुलाई बेईज्जत महसुस भएको हुनुपर्ने र यसले उनको मानसिक स्थितिमा प्रतिकूल असर परेको अनुमान गरिएको छ ।
समुदायिक विद्यालयमा क्लास चलिरहेको बेलामा मेयर यादवले डनगिरी देखाउँदै एकाएक पसे । बिना कुनै सोधपुछभन्दा पनि उनीहरुको कपाल काटन लगाएको आरोप स्कूलका एक कर्मचारीले लगाए ।
“उनीहरुलाई एक दिनको समय दिन सकिन्थ्यो, बरु स्कूलको प्रशासनलाई बालकहरुले सभ्य तवरले कपाल बनाएर आउनुपर्ने जस्ता निर्देशन दिन सकिन्थ्यो । निर्देशन पालना नभएर कक्षाभित्र नै कपाल काट्ने चेतावनी दिन सकिन्थ्यो, तर त्यस्तो नगरिकन एकाएक बिना कुनै पूर्व सूचना, सम्झाउन भन्दा पनि कपाल काटे, यसले उनीहरुको दिमागमा खराब र नाकारात्मक असर पर्न सक्छ ।”– नाम नखोल्ने शर्तमा एक कर्मचारीले बताए ।
यति मात्र होईन, अति विपन्न परिवारका बालबालिकाहरुलाई स्कूले पोशाक नभएको खण्डमा कक्षाबाट बाहिर निकालिदिए मेयरले । पोशाक नभएकै खण्डमा बालबालिकाहरुलाई पढाईबाट बँचित गरेपछि उनको कडा आलोचना भएको छ ।
सो क्रममा उनले विद्यालयको अवस्था सुधारको लागि विद्यालय प्रशासनलाई निर्देशन पनि दिए । त्यसरी नै विद्यार्थीहरुको कपालको सवालमा निर्देशन दिएको भए उत्तम हुने थियो भन्दै एक कर्मचारीले उनको शैलीको आलोचना गरे ।
यस सन्दर्भमा सिरहाका मेयर यादवसँग सम्पर्क गर्दा उनी व्यस्तता जनाए ।
सोही सन्दर्भमा सिरहा प्रमुख जिल्ला अधिकारी (सिडिओ) लालबाबु कवारीले यस सन्दर्भमा आफूलाई केही थाहा नभएको र यसबारे बुझेर मात्र भन्न सकिने बताए ।
