न्यूजमधेश डेस्क
जनकपुरधाम,१४ असार । मतदाता सूचीमा महिला, दलित र सीमान्तकृत समुदायको पहुँच सुनिश्चित गर्न माग गरिएको छ ।
दलित सरोकार मञ्च नेपाल सप्तरी र राष्ट्रिय दलित पत्रकार संघ धनुषाले मंगलबार जनकपुरधाममा सरोकारबालासँग अन्तरकृया कार्यक्रमको आयोजना गरी उक्त माग गरिएको छ ।
कार्यक्रममा मधेस प्रदेशमा दलित वर्गलाई निर्वाचनमा सहभागि गराउन तथा मतदाता नामावली संकलन गर्न दलित केन्द्रित मतदाता कार्यत्रबmम संचालन गर्न सरोकारवालाले जोड दिए ।
उनीहरुले दलित समुदाय सधैं भेदभावको शिकार हुँदै आएका कारण उनीहरुको समस्या समाधान गर्न सरकारसँग माग गरे ।
कार्यक्रमका प्रमुख अतिथि लोसपाका प्रदेश सांसद प्रमेश्वर साहले विभेदकारी संविधानका कारण दलित विभिन्न समस्याबाट गुज्रिरहेको बताए ।
सांसद साहले सीमान्तकृत समुदाय र महिला दलितलाई दबाबमा राख्न चाहने दललाई मधेसका जनताले भोट दिएकाले महिला, दलित र सीमान्तकृत समुदायका समस्या समाधान हुन नसकेको गुनासो गरे ।
अर्का प्रदेश सांसद चमेलीदेवी दासले दलितको मतदाता नामावली वा नागरिकताको समस्या समाधानका लागि संसदमा आवाज उठाए पनि प्रदेश सरकार पेन्डुलमजस्तै भएकाले कुनै समाधान हुन नसकेको बताइन् ।
दलित सरोकार मञ्चले महिला, दलितलगायत सीमान्तकृत जनताका समस्या समाधानका लागि प्रदेशका अन्य जिल्लामा पनि अन्तरक्रिया गरिरहेको फोरमका कार्यक्रम संयोजक रोशन पासवानले बताए ।
राष्ट्रिय दलित पत्रकार संघ धनुषाका अध्यक्ष कुलदीप दास प्रेमको अध्यक्षतामा कार्यक्रमको आयोजना गरिएको थियो ।
