न्यूजमधेश डेस्क
जनकपुरधाम,२४ असार । जनकपुरधाममा सार्वजनिक जग्गा अतिक्रमण गरी बनाउन लागिएको सडक निर्माणको काम रोक्न उपमहानगरपालिकाले दिएको निर्देशन विपरित कामलाई निरन्तरता दिइएको छ ।
एक व्यक्तिले आफ्ना लागि सार्वजनिक जग्गा अतिक्रमण गरी नालासहितको बाटो निर्माण गर्न थाल्दा स्थानीयले बिरोध गरेपछि
उपमहानगरपालिकाले काम रोक्का गर्न आदेश दिएको छ ।
उपमहानगरपालिकाको वडा नम्बर ९ स्थित डेली टोलमा रामजानकी मन्दिरको जग्गा अतिक्रमण गरी सडक बनाउन थालेको स्थानीयले बताएपछि प्रमुख प्रशासकीय अधिकृत प्रधुम्न प्रसाद उपाध्यायले काम रोक्का गर्न वडालाई पत्राचार गरेको छ ।
‘वडावासी विनोद कुमार साह लगायत १७ जनाले यस कार्यालयमा पेश गरेको निवेदन अनुसार “वडा नं ९ को डेली टोलमा वडा कार्यालपदेखी दक्षिण सिट नं. १३१५÷२४, कि.नं. ४९ र ५० को लगभग ५ धुर जग्गा सार्वजनिक रहेको र उक्त जग्गा अतिक्रमण गरी नाला र सडक निर्माण कार्य गरिरहेकोले उक्त अतिक्रमण कार्य अविलम्ब रोक्का गरी सार्वजनिक जग्गा संरक्षण गरि पाउँ भनी पेश गरेको निवेदनमा उक्त सार्वजनिक जग्गामा निर्माण कार्य नगर्न÷नगराउनु हुन जानकारी गराइन्छ’ उपाध्यायले वडालाई पठाएको पमा उल्लेख छ ।
उक्त सार्वजनिक जग्गामा निर्माण कार्य भए÷गरेमा कार्यालय भुक्तानी गर्न बाध्य नहुने चेतावनी समेत दिइएको छ ।
यस्तो चेतावनीपछि पनि रामबाबु साहले आफ्नै अगुवाईमा सडक निर्माणलाई निरन्तरता दिएका छन् । साहको आफ्नो बाटो बनाउन वडा कार्यालयले उनलाई बजेट दिएको स्थानीय बताउँछन् ।
स्थानीय बृद्ध हरिनारायण साहले रामबाबुले बर्षाैदेखि इनारसहित रहेको जानकी मन्दिरको जग्गा अतिक्रमण गरी बाटो बनाउन लागिपरेको बताए ।
अर्का स्थानीय हेमशंकर यादवले वडा अध्यक्ष परमेश्वर साहले रामबाबुको व्यक्तिगत बाटो बनाउनका लागि बजेट दिएर सहयोग गरिरहेको बताए ।
यस सम्बन्धमा वडा अध्यक्ष साहसँग सम्पर्क गर्न खोज्दा हुन सकेन् ।
