न्युजमधेस डेस्क
जनकपुरधाम,२८ असार। नेपाल विद्युत् प्राधिकरण ढल्केवर रिड शाखामा कार्यरत सुपरभाइजर अनिलकुमार यादवमाथि कुटपिट भएको छ ।
असार १५ गते उनीमाथि कार्यालय प्रमुख राजीव शर्माको निर्देशनमा कुटपिट भएको आरोप लागेको छ । सोही कार्यालयका इन्जिनियर शर्मासहित ७/८ जनाको समूहले यादवमाथि कुटपिट गरेको बताइएको छ । कुटपिटबाट घाइते भएका यादव प्रादेशिक अस्पतालमा उपचार गराएका थिए । आइतबार घटना बारे ध्यानाकर्षण गराउँदै धनुषाको प्रमुख जिल्ला अधिकारीलाई ज्ञापनपत्र बुझाइएको छ ।
प्रदेश सरकारलाई पनि कर्मचारी संगठनहरुले ध्यानकर्षण गराएका छन् । नेपाल निजामती कर्मचारी संगठन, नेपाल मधेशी निजामती कर्मचारी मञ्च, नेपाल निजामती कर्मचारी युनियन, राष्ट्रिय कर्मचारी संगठनका धनुषा जिल्ला कार्य समिति र मधेश प्रदेश समितिले संयुक्त विज्ञप्ति जारी गरेका छन् । विज्ञप्तिमा दोषी पत्ता लगाई कारवाही गर्न माग गरिएको छ ।
कार्यालयमा भइरहेको अनियमितताको विरुद्ध आवाज उठाउँदा कार्यालय प्रमुख शर्मा, इन्जिनियर मनिष शर्मा, इलेक्ट्रिसियन समिर मगर, कर्मचारी अशोक कुमार चौधरी, चतुर लाल थारु, पवन थारु, हरि बहादुर थारु र भागिराम थारु लगायतले कुटपिट गरेको विज्ञप्तिमा उल्लेख गरिएको छ।
