न्युजमधेस डेस्क
काठमाडौ, २९असार।
पछिल्लो तीन घण्टायता काठमाण्डौ उपत्यकासहित सोलुखुम्बु, रामेछाप, दोलखा, सिन्धुपाल्चोक र नुवाकोट आसपासको क्षेत्रमा ठूलो पानी परिरहेको छ ।
४ वटा जिल्लामा ठूलो पानी परिरहेकाले नदी तथा खोलामा पानीको बहाव बढेको छ । विशेष गरी खिम्ती खोला र सोलुखोलामा आकस्मिक बहाव बढ्न सक्ने भएकाले आज राति ९ बजेसम्म नै सतर्कता अपनाउन बाढी पूर्वानुमान महाशाखाले आग्रह गरेको छ ।
पानी पर्ने क्रम अझै एक/दुई घण्टा कायम रहने मौसमविद् सजिना शाक्यले बताउनुभयो । यस्तै अहिले वाग्मतीसँगै प्रदेश-१ र लुम्बिनी प्रदेशका विभिन्न ठाउँमा पानी परिरहेको छ ।
पछिल्लो तीन घण्टामा काठमाण्डौ उपत्यकामा ३२ मिलिमिटर, जिरीमा ३५, सोलुखुम्बुमा ५३ मिलिमिटर र सिन्धुपाल्चोकमा ३८ मिलिमिटर पानी परेको छ । काठमाण्डौ उपत्यकाका केही ठाउँमा अहिले बेलुका ठूलो पानी परेकाले उपत्यका भएर बग्ने नदी तथा खोलामा पनि पानीको बहाव बढेको छ ।
ग्राफ : बाढी पूर्वानुमान महाशाखा
