न्युजमधेस डेस्क
जनकपुरधाम,६ साउन। मधेश प्रदेशमा आर्थिक वर्ष ०७८÷०७९ मा सडक दुर्घटनामा परी ५८५ जनाको मृत्यु भएको छ ।
मधेश प्रदेश ट्राफिक प्रहरी कार्यालयका अनुसार सप्तरी, सिरहा, धनुषा, महोत्तरी, सर्लाही, रौतहट, बारा र पर्सा जिल्लाको विभिन्न ठाउँमा भएका पाँच हजार ७११ सवारी दुर्घटनामा ५८५ जनाको मृत्यु भएको हो ।
ट्राफिक प्रहरी कार्यालय मधेश प्रदेशका प्रमुख प्रहरी उपरीक्षक नान्तीराज गुरुङ्ले एक वर्षको अवधिमा ४४८ पुरुष, ८१ महिला, ४२ बालक, १४ बालिकाको मृत्यु भएको बताउनुभयो । उहाँले अनुसार यस अवधिमा नौं हजार ४६४ जना घाइते भएको जानकारी दिनुभयो ।
घाइतेहरुमा छ हजार ६३४ पुरुष, एक हजार ५२७ महिला, ८५७ बालक र ४४६ बालिका छन् । सो अवधिमा मादक पदार्थ सेवन गरी मोटरसाइकल चलाउने, हेल्मेट नलगाउने क्षमताभन्दा बढी यात्रु बोक्ने र पटके गरी दुइ लाख ६४ हजार ३१० वटा सवारी कारवाहीमा परेको मधेश प्रदेश ट्राफिक प्रहरी कार्यालय पथलैयाले जनाएको छ ।
यस्तै, मधेश प्रदेशमा आर्थिक वर्ष ०७७÷०७८ मा सडक दुर्घटनामा परी ५२३ जनाको मृत्यु भएको थियो । मधेशको आठवटै जिल्लाको विभिन्न ठाउँमा भएका तीन हजार ९८३ सवारी दुर्घटनामा ५२३ जनाको मृत्यु भएको थियो ।
मधेश प्रदेश ट्रापिक प्रहरी कार्यालय बाराको थपलैयाले आर्थिक वर्ष ०७७÷०७८ मा ३९४ पुरुष, ६८ महिला, ३६ बालक र २५ बालिकाको मृत्यु भएको जानकारी दिएको छ । त्यस अवधिमा छ हजार ४०० जना घाइते भएका थिए ।
घाइतेहरूमा चार हजार २६८ पुरुष, ८७३ महिला, ५७० बालक र २९३ बालिका थिए । सोही अवधिमा मादक पदार्थ सेवन गरी मोटरसाइकल चलाउने, हेल्मेट नलगाउने क्षमता भन्दा बढी यात्रु बोक्ने १० हजार ७०५ जनालाई कारवाही गरिएको मधेश प्रदेश ट्रापिक प्रहरी कार्यालयको तथ्याङ्कमा उल्लेख छ । गोरखापत्र दैनिकबाट
