न्युजमधेस डेस्क
जनकपुरधाम,६ श्रावण।
रोपाइँ गरेर धानबालीका लागि पानी पर्खेका किसानलाई धेरै राहत भएको छ । शुक्रबार बिहानैदेखि मुसलधारे वर्षा भएपछि धनुषा सहित मधेसका किसानलाई राहत महसुस भएको हो । मध्य असारबाट पानी नपर्दा खेतको धान सुक्न थालेको थियो । आली भर्ने गरी पानी परेपछि भने धेरै राहत भएको सबैला नगरपालिका–९ भठिहन टोलका कृषक पवन रायले बताउनुभयो ।
‘पानी नपर्दा खेतमा धाँजा फाटिसकेको थियो’, उहाँले भन्नुभयो। ‘लामो पर्खाइपछि परेको पानीले धानलाई धेरै राम्रो गरेको छ ।’ कृषक रायका अनुसार पानी नपर्दा धान सुक्न थालेको थियो । ‘पानी पर्खौं कि अब सुक्न लागेको धानमा सिँचाइ गरौं भन्ने दोधारमा थिएँ’, उहाँले अगाडि थप्नुभयो, ‘जे होस आज पर्यो । अब बोरिङले सिँचाइ गर्नु पर्दैन ।’
यसवर्ष नेपालमा मनसुनी वर्षा सरदरभन्दा बढी रहेको पूर्वानुमान भए पनि अहिलेसम्म एकदमै ठूलो वर्षा भने भएको छैन । रोपाइँकै बेला पानीको अभाव झेलेका किसानले धान रोपिसकेपछि पनि त्यहि समस्या झेलिरहेका थिए । चर्को घाम लाग्दा भएको सुख्खाका कारण धान नै सुक्न थालेपछि कतिपय किसाले त धान रोपेको खेतमा बोरिङले सिँचाइ नै गरिसकेका छन् ।
