न्युजमधेस डेस्क, जनकपुरधाम,७ साउन। जनकपुरधाम उपमहानगरले साताको एक दिन शुक्रबार पैदल वा साइकलमा मात्र कार्यालय आउने अभियान सुरु गरेको छ । शुक्रबार नगरप्रमुख मनोजकुमार साह, उपप्रमुख किशोरी साहसहितका जनप्रतिनिधि तथा कर्मचारीले साइकलमा नगर परिक्रमा गरी अभियान थालेका हुन् ।
‘अबदेखि जनप्रतिनिधि र कर्मचारीहरू शुक्रबार पैदल वा साइकलमा कार्यालय आउँछन् । अर्को शुक्रबारदेखि उनीहरूको मोटरसाइकल उपमहानगर परिसरमा प्रवेश निषेध हुन्छ,’ नगर प्रमुख साहले भने । शुक्रवार र शनिबार दुई दिन सरकारी सवारी नचलाएपछि इन्धनमा खर्च हुने लाखौं रुपैयाँ बचत हुने उनको दाबी छ । ‘शनिबार बिदाको दिन सरकारी गाडी चल्ने कुरै भएन । शुक्रबार पनि नचलेपछि इन्धनमा लाग्ने खर्च बचत हुनेछ,’ उनले भने ।
चालु आर्थिक वर्ष २०७९/८० को नीति तथा कार्यक्रममा उपमहानगरले साताको एक दिन साइकल चढ्ने र पालिकाभित्रका अन्य कार्यालयलाई समेत साइकल प्रयोग गर्न पत्राचार गर्ने उल्लेख गरेको थियो । पालिकाका कर अधिकृत परमेश झाका अनुसार शुक्रबार साइकल प्रयोग गर्न पालिकाभित्रका सम्पूर्ण सरकारी तथा गैरसरकारी संघसंस्थाहरूलाई पत्राचार गरिसकिएको छ ।
‘शुक्रबार र शनिबार स्थानीयले पनि साइकल प्रयोग गरून् भन्ने हाम्रो रणनीति हो,’ नगरप्रमुख साहले भने, ‘यसका लागि पहिलो चरणमा नगरपालिकाबाटै अभियान सुरु गरिएको हो ।’ भानुचौकमा व्यवसाय गरिरहेका विनोद लुइँटेलले नगरको अभियानलाई सकारात्मक भएको बताए । ‘इन्धनको बचत हुने, पर्यावरण संरक्षण हुने अनि स्वास्थ्यलाई पनि लाभ हुने यस अभियानलाई सबैले सहयोग गर्नुपर्छ,’ उनले भने ।
यस्तै, उपमहानगरले फुटपाथमा सञ्चालित खुद्रा पसल तथा सडकमा राखिने निर्माण सामग्री हटाउने अभियान पनि सुरु गरेको छ । अभियानको पहिलो दिन बिहीबार नगर प्रमुख साहसहितको टोलीले नगरको मुख्य क्षेत्रमा पैदल मार्चपास गरेको थियो । ‘पहिलो चरणमा जनजागरण, दोस्रो चरणमा सम्झाइबुझाई र तेस्रो चरणमा सडक पेटीमा पसल सञ्चालन गर्ने तथा निर्माण सामग्री राख्नेहरूमाथि कारबाही अघि बढाइनेछ,’ प्रमुख साहले भने ।
नेपाल लोकतान्त्रिक पार्टीका जिल्ला सचिव चौधरीसहित सयौं जना जनमतमा प्रवेश
निहारिका राजपुत प्रकरण : बलात्कारको आरोप लागेका श्रेष्ठ पक्राउ
विपासाको बेबीबम्पमा करणको चुम्बन : आमाबाबु बन्दै बलिउडको हट जोडी