न्युजमधेस डेस्क
जनकपुरधाम,११ साउन।
जनकपुरधामबाट दिउसै दुई लाख रुपैयाँ लुटेर भागेका लुटेराको पहिचान हुन सकेको छैन् ।
सोमबार मिल्स एरियास्थित एभेरेष्ट बैंकबाट पैसा झिकेर घर जाँदै गरेकी शर्मिला यादवको दुई लाख रुपैयाँ मोनाष्टिक स्कुलनजिक मोटरसाइकलमा आएका दुई जनाले लुटेर भागेका थिए । धनुषाका प्रहरी नायव उपरीक्षक (डिएसपी) प्रदीप बहादुरल क्षेत्रीले बैंकको सिसिटिभी फुटेजमा शंकास्पद व्यक्ति देखिएको बताए । यद्यपि उनको पहिचान हुन सकेका छैन् । ‘उनीहरु मास्क लगाएको फुटेजमा देखिएको छ । ती महिलामाथि उनीहरु पटक पटक निगरानी गरिरहेको र कुनै कामले बैंकमा गएको देखिन्छ,’उनले भने,‘लुट्ने बेला पनि मास्क र दुबै जनाले हेलमेट लगाएको कारण खोजी गर्न केही कठिनाई भइरहेको छ ।’ प्रहरीले अर्को माध्यमबाट लुटेराको खोजी सुरु गरेको उनले जानकारी दिए । शर्मिलाका श्रीमान् देवशरण यादव साउदीमा छन् । उनले नै पठाएको रकम बैंकबाट झिकेर घर जाँदै गर्दा बाटोमा शर्मिलाको हातबाट रातो मोटरसाइकलमा आएका व्यक्तिहरुले लुटेर भागेको प्रहरीले जनाएको छ । उनका अनुसार झोलामा २ लाख नगद, नागरिकता, बैंक सम्बन्धी कागजात र बाटो खर्चको लागि राखेको थप पाँच सय रुपैयाँ थियो ।
