न्युजमधेस डेस्क
धरान,१४ श्रावण।
सुनसरी धरानका नगरप्रमुख हर्क साम्पाङ देशकै निम्ति मर्न सकूँ भन्दै रोएका छन् । धरानस्थित निशाने खोलामा आज बिहान रुख रोप्न पुगेका उनी धरान ब्युटी कन्टेस्टमा भाग लिने युवतीहरूलाई सम्बोधन गर्ने क्रममा रोएका हुन् । उनको यो भिडियो अहिले भाइरल बनेको छ । धरानको स्थानीय मिडियामा प्रसारित भिडियोमा उनी आफूले लेखेको देशभक्तिपूर्ण गीत सम्झिँदै सम्बोधन गर्दै थिए । त्यस क्रममा अचानक डाँको छोडेर रोएको देखिन्छ ।

उनले सम्बोधनका क्रममा भनेका थिए, ‘देशकै निम्ति मर्न सकूँ, देशकै लागि गर्न सकूँ, जे होस् मलाई खुसी लाग्छ । आज देश विदेशबाट भेट्न आउनु भएको छ । (रुँदै…) म एउटा सानो मान्छे हुँ । देश सोच्नुहोस्, देशकै लागि कर्म गर्नुहोस् । एक दिन मर्नुपर्दा पनि देशकै लागि मर्नुपर्छ भन्ने उत्प्रेरणा दिन चाहन्छु ।’ उनले आफ्नो सम्बोधनकै क्रममा प्रतियोगितालाई उत्प्रेरणा दिने ठाउँमा आफू भए पनि एक्कासि रुन आएको बताएका थिए । ‘म तपाईंहरूलाई प्रेरणा दिन आएको थिएँ तर आफैँ भावुक बने,’ उनले भने, ‘म मान्छे हुँ, मान्छेलाई कहिले हाँस उठ्छ, कहिले रिस, कहिले रुन आउँछ यस्तै भयो आज ।’

निशाने खोलामा उनले पानीमा भिज्दै विरुवा रोपेका थिए । त्यस क्रममा उनले जलाधार क्षेत्रमा वृक्षारोपण नगरिँदा र भएको पनि जग्गा किनबेचको नाममा मासिँदा खोलामा पानी सुकेको बताए । त्यस क्षेत्रमा अब १ करोडभन्दा बढी बिरुवा रोप्नुपर्ने बताउँदै उनले त्यसपछि खोलामा चैत महिनामा पनि पानी बग्न थाल्ने विश्वास व्यक्त गरे ।

त्यस क्रममा उनलाई साथ दिन थुप्रै मानिस त्यहाँ पुगेका थिए । मेयर साम्पाङले आफू सानो मान्छे भए पनि देश, विदेशबाट पाएको साथ, माया र समर्थनले आफूलाई भावुक बनाएको र रुन पुगेको प्रतिक्रिया दिएका छन् । ‘मान्छे हो, घरी मान्छेलाई हाँस उठ्छ, घरी रिस उठ्छ, रुन पनि मन लाग्दो रहेछ, त्यो स्थितिमा मलाई आज अचानक फिल भयो,’ उनले स्थानीय मिडियालाई प्रक्रिया दिँदै भने, ‘कुनै दुःख र पीडाले होइन, हर्षले नै म रोएको हो ।’


हाम्रो बारेमा

ताजा र खोजमूलक समाचार, विचार, विश्लेषण र अन्तर्वार्ता निरन्तर सम्प्रेषण गर्दै जानेछ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा कहिल्यै कसैसँग सम्झौता गर्ने छैन ।  अनलाइन पत्रिकाको रुपमा निरन्तर सुचना प्रवाहमा जागरुक रहन्छ ।

हाम्रो समुह

संचालक  : मनोज कुमार मोरबैता
सम्पादक : मनोज बनैता

वरिष्ठ सल्लाहकार : बिपी साह
वरिष्ठ  सल्लाहकार : श्रवण देव

वरिष्ठ  सल्लाहकार : मोहन सिंह
वरिष्ठ  सल्लाहकार  : सन्तोष जादब

सम्पर्क

श्री मधेश न्यूज नेटवर्क प्रा.लि.

जनकपुरधाम , धनुषा ( नेपाल )

सम्पर्क : ९८४४५२०३२० ,९८०७७४९०००
ईमेल : [email protected] , [email protected]

Copyright © 2018-2022 News Madhesh