न्युजमधेस डेस्क
जनकपुरधाम,१७ श्रावण।
उदयपुरको बेलका नगरपालिका–८ स्थित जिरो पाइन्टबाट सप्तकोसीको बाढी बस्तीतर्फ पस्न लागेको छ । निरन्तरको वर्षाका कारण सप्तकोसीमा आएको बाढीले कटान गर्दै लगेपछि बाढी बस्तीमा पस्ने खतरा बढेको हो ।
२०४५ सालमा कटान गरेकै स्थानबाट कोसीले कटान गर्न थालेपछि थप जोखिम बढेको छ । बेलका नगरपालिकाका नगर प्रमुख अशोक कार्कीले कोसी अनलाइनसँग भने, ‘कटान रोक्न हरेक प्रयास गरेपनि कटान रोकिएको छैन । अब तीन मिटर कटान हुन बाँकी छ । तीन मिटर कटान भएमा बाढी बस्तीमा पस्छ । कटान रोक्न अहिलेपनि प्रयास गरिरहेका छौँ ।’
५ वटा जेसिभी, २ वटा एस्काभेटर र ५० वटा ट्याक्टरले अहिले कटान भइरहेको स्थानमा काम गरिरहेको उनले बताए । प्रभावित हुने बस्तीलाई सुरक्षित ठाउँमा सार्नका लागि पनि पहल भइरहेको उनले जानकारी दिए ।
उनले भने, ‘स्थानियलाई पनि पूर्वतयारीमा रहन भनेका छौँ । हामीले सबैतिर सुचना पनि गरिसकेका छौँ । टेन्टदेखि लिएर खाद्यान्नको विषयमा पनि कुरा गरिसकेका छौँ । अहिले पनि बाढी पस्न नदिन काम गरिरहेका छौँ ।’ यता उदयपुरका प्रमुख जिल्ला अधिकारी बिरेन्द्र कुमार यादवले कोसीले उक्त स्थानमा धेरै कटान गरिसकेको बताए ।
उनले कोसी अनलाइनसँग भने, ‘कटान केही अगाडीबाट नै गर्दै आएको थियो । अहिले पानीको बहाव पनि बढेका कारणले जोखिम बढेको छ ।’ रोकथामका लागि स्थानिय निकाय, सुरक्षा निकाय सबै लागिपर्नु भएको छ, उनले भने, ‘पानीको बहाव बढेको हुनाले समस्या भएको छ । जोखिमलाई मध्यनजर गरेर सचेत हुन सबैलाई आग्रह गरेका छौँ ।’ नदी पुरानो धारमा फर्किने सम्भावना देखिएको उनले बताए ।
बाँकी तीन मिटर क्षेत्र कटान भएमा बाढीबाट सुनसरीको सिसौलीघाट, उदयपुरको धौरी टप्पु, चिलिमे, एबीसी, श्रीलंका टापु र रामनगर लगायतका स्थानीय प्रभावित हुनेछन् ।
