न्युजमधेस डेस्क
जनकपुरधाम,१९ साउन। नेपाल रेल्वे कम्पनी लिमिटेडले जनकपुर–जयनगर–बर्दिबास रेल्वे ट्र्याक निर्माणका क्रममा मुआब्जा विवाद चर्किएको छ । ट्र्याकका लागि अधिग्रहण गरिएको जग्गाको मुआब्जा वितरणमा ठगी गरेको भन्दै रेल्वे पीडित संघर्ष समितिले विरोध प्रदर्शन गरेका छन् ।
बिहीबार जनकपुरधामस्थित नेपाल रेल्वे विभागको कार्यालय परिसरमा विरोध प्रदर्शन गर्दै उनीहरुले प्रतिकठ्ठा १५ लाख रुपैयाँ दिने भनिए पनि रेल्वे कम्पनीले दस लाख रुपैयाँमात्रै दिएर ठगी गरेको आरोप लगाएका हुन् । रेल्वे पीडित संघर्ष समितिका अध्यक्ष ज्ञानबहादुर थापाले मुआब्जाको दररेट निर्धारण गर्नेबेलामा बर्दिबासस्थित मुसहर बस्ती जाने बाटो र खोल्सी पैनी बीचको जग्गालाई अधिग्रहण गर्ने क्रममा विभागले १५ लाख रुपैयाँ निर्धारण गरे पनि १० लाख रुपैयाँमात्र दिएको आरोप लगाए ।
उनले नापनक्सामा सो पैनी रहेको स्थलभन्दा करिब ५ सय मिटर अघिलाई नै विभागले मान्यता दिएपछि यस्तो अवस्था उत्पन्न भएको बताए । उनले सो प्राविधिक समस्याका कारण यस्तो अवस्था उत्पन्न भएको र विभागलाई समयमै जानकारी गराउँदा पनि बेवास्ता गरेकाले विरोधस्वरुप आन्दोलन गर्नुपरेको बताए । अध्यक्ष थापाले सो खोल्सी पैनीबारे छानबिन गर्नसमेत माग गरेका छन् ।
यता विभागका साइट इन्जिनियर विनोद ओझाले भएको गल्तीलाई सच्याइने आश्वासन दिएका छन् । उनले सरकारले निर्धारण गरेको मुआब्जा वितरणमा भएको प्राविधिक त्रुटी सच्याएर बाँकी बक्यौताका लागि आफूहरुले पहल गर्ने बताए ।
आन्दोलनमा संलग्न निरज अधिकारीले सरकारले निर्धारण गरेको रकम अनुसार आफूहरुले किन मुआब्जा पाउन सकेनौँ भन्ने सवालको छानबिनका लागि रेल्वे विभागसँग माग गरेको बताए । उनले विभागले गरेको प्राविधिक त्रुटीका कारण सरकारले निर्धारण गरेको मुआब्जाभन्दा कम पाएकाले सोको छानबिन हुनुपर्ने जिकिर गरे ।
संघर्ष समितिले रेल्वे विभागले गरेको प्राविधिक त्रुटीका कारण समस्या उत्पन्न भएको तर सोको समाधानका लागि बेवास्ता गरेका कारण महाप्रबन्धक निरञ्जन झाको राजीनामा समेत माग गरेका छन् ।
