न्यूजमधेश डेस्क
काठमाडौं ,२५ श्रावण ।वरिष्ठ वैज्ञानिक डा. जयकान्त राउत प्रतिनिधि सभाको चुनाव लड्ने आसन्न निर्वाचनका लागि मुलुकमा विभिन्न क्षेत्रबाट उम्मेदबारी घोषणा भईराखेको छ । समाजमा विभिन्न क्षेत्रमा योगदान पुर्याएका स्वतन्त्र र स्वच्छ छवि कहलिएका विज्ञहरूसमेत चुनाबी रणमैदानमा होमिन तयार देखिएका छन् ।
यस्तैगरी लामो समय कृषि अनुसन्धानमा समय विताएका विज्ञानकर्मी एवं वरिष्ठ वैज्ञानिक डा. जयकान्त राउत पनि आउँदो प्रतिनिधि सभाको चुनाव लड्नेत भएका छन् ।
तत्कालिन स्वतन्त्र मधेश गठबन्धन र नेपाल सरकारबीच वार्ता गराई जनमत पार्टी स्थापना गराउने प्रमुख व्यक्तिको रूपमा समेत उनलाई चिनिन्छ । विज्ञानकर्मी एवं वरिष्ठ वैज्ञानिक डा. जयकान्त राउत आउँदो मंसिर ४ मा हुने प्रतिनिधि सभाको चुनावमा सप्तरी–१ वा ललितपुर र काठमाडौंबाट उम्मेदवारी दिने कुरा सार्वजनिक गरेका हुन् ।
डा. राउत एक जना अब्बल विज्ञानकर्मी हुन् । समसामयिक राजनीतिमासमेत रुचि राख्ने राउत नेपालमा कृषिमा आधुनिकीकरणले मात्रै मुलुकको समृद्धि भेट्ने बताउँछन् । मुलुक दलाल र पूँजिपतिहरुको हातमा फसेको विषय अर्थ डबलीसँगको एक अन्तर्वातामा समेत बताएका थिए ।
जनमत पार्टीको स्थापना र सञ्चालनमा उनको भूमिका महत्वपूर्ण मानिन्छ ।
स्वराज आन्दोलनको क्रममा २०७१ सालमा प्रहरीले डा.राउतलाई सुन्धाराबाट पक्राऊ गरी प्रहरी हिरासत हनुमानढोकामा समेत राखेका थिए ।
जनमत पार्टीका राष्ट्रिय अध्यक्ष डा. सीके. राउतलगायत अन्य स्वराजीलाई प्रहरीले पटक पटक समात्दा र महिनौंसम्म हिरासत र जेलमा राख्दा बाहिर सम्पूर्ण कानूनी व्यवस्था मिलाउने, हिरासत र जेलमा नियमित अपडेट लिने तदअनुरूप आवश्यक व्यवस्था मिलाउने, संगठनसँग समन्वय गर्ने जस्ता जिम्मेबारी बहन गरेका थिए । डा. सी. के. राउत हिरासत वा जेलमा परेपछि उनको बाहिरी कार्यकर्ता वा संगठनसँग सम्पर्क थिएन ।
पार्टीमा राउतले आवश्यक समन्वय र व्यवस्था गर्नुको साथै सम्पर्क सूत्रको रूपमा काम गरिसकेका छन् ।
विभिन्न अवस्थामा उनले आर्थिक, सामाजिक कठिनाईहरू भोगेका छन् । प्रहरीबाट पटक पटक दु्र्व्यवहारको समेत सामना गर्नुपरेको राउत बताउँछन् ।
पार्टी संगठनलाई सहयोग गर्दा डेराबाट समेत निष्कासित हुनु परेको तितो यथार्थ उनीसँग छ ।
हाल पनि डा. राउत स्वराज आन्दोलनको क्रममा होस् कि किसान आन्दोलनको क्रममा लागेका मुद्दाहरू फिर्ता लिने विषयमा नेपाल सरकारसँग पहल गर्दै आएका छन् ।
यहि आम निर्वाचनमा आवश्यकता र पार्टीको निर्णय अनुसार आफ्नो उम्मेदबारी जनमत पार्टीबाट नै रहने उनले अठोट गरेका छन् । भन्छन्, स्वच्छ र सफा मन लिएर राजनीतिमा नेतृत्व गर्दा मुलुकको समृद्धिमा सहयोग पुग्नेछ ।
