सन्तोष यादव
जनकपुरधाम ,५ भाद्र। आसन्न मंसिर ४ को आम चुनावमा धनुषा क्षेत्र नम्बर २ मा रोचक भिडन्तको सम्भावना देखिएको छ । अहिलेसम्म कसैले आधिकारिक उम्मेदवारी घोषणा नगरेपनि आकांक्षीहरू माहोल बनाउन मतदाताको घरदैलोमा देखिन थालेका छन् ।
यस क्षेत्रका बहालवाला सांसद हुन् उमाशंकर अरगरिया । २०७४ को निर्वाचनमा तत्कालीन संघीय समाजवादी फोरम नेपालबाट अरगरिया झण्डै १४ हजार मतान्तारले विजयी भएका थिए । उनले ३२ हजार ४४ मत ल्याएर जित्दा निकट प्रतिद्वन्दी नेकपा माओवादी केन्द्रका रामचन्द्र झाले १८ हजार ७१५ मत पाएका थिए ।
त्यतिबेला माओवादी र नेकपा एमाले तथा समाजवादी फोरम र तत्कालीन राष्ट्रिय जनता पार्टी (राजपा) बीच गठबन्धन भएको थियो । हाल अरगरिया महन्थ ठाकुर नेतृत्वको लोकतान्त्रिक समाजवादी पार्टीका प्रमुख सचेतक हुन् भने झा नेकपा एकिकृत समाजवादीका सचिवालय सदस्य । आसन्न निर्वाचनमा पनि दुवैजना आमनेसामने हुने लगभग निश्चित छ । दुवैजना चुनावको तयारीसमेत थालिसकेका छन् ।
अरगरिया पछिल्लो पटक केपी ओली नेतृत्वको सरकारमा पर्यटनमन्त्री बनेका थिए । झा पनि स्थानीय विकास मन्त्री भइसकेका छन् । उनी २०५१ मा प्रतिनिधिसभा र २०६४ मा संविधानसभा सदस्यमा निर्वाचित भएका थिए । संविधानसभामा निर्वाचित भएको बेला माओवादी अध्यक्ष पुष्पकमल दाहाल प्रचण्ड नेतृत्वको सरकारमा उनी स्थानीय विकास मन्त्री बनेका थिए ।
त्यसपछि माओवादीमा पुगेका उनी ७० र ७४ को निर्वाचनमा पराजित भए । एमालेबाट माओवादी, नयाँ शक्ति र पुनः माओवादी हुनै उनी एकीकृत समाजवादीमा पुगेका छन् । दिग्गज नेता मानिने झा पटक-पटक पार्टी परिवर्तन गर्दा सो क्षेत्रमा कमजोर बनेको विश्लेषण हुन थालेको छ । यद्यपि उनी अरगरियाको दबदबा तोडेर यो पटक पुनः चुनाव जित्ने कसरतमा छन् ।
सो क्षेत्रमा जनता समाजवादी पार्टी (जसपा) बाट बलराम महतोको नाम चर्चामा छ । ठेकेदारसमेत रहेका महतो रमण कन्ट्रक्सनका मालिक थिए । तर, कन्ट्रक्सन आफ्ना छोरालाई सुम्पेर स्थानीय तहको निर्वाचनमा जनकपुरधामको मेयरमा स्वतन्त्र चुनाव लडे तर पराजित भए । लगत्तै उनलाई प्रतिनिधिसभा चुनावमा टिकट दिने सर्तमा उपेन्द्र यादवले जसपामा भित्र्याएका थिए ।
सत्ता गठबन्धनमा रहेका नेपाली कांग्रेसका रामकृष्ण यादव, मुक्ता यादव र दिनेश प्रसैला पनि दाबेदार छन् । तत्कालीन समाजवादी फोरमबाट विजयी अरगरिया लोसपामा पुगेको र सत्ता गठबन्धनमा आबद्ध माओवादीबाहेक कांग्रेस, जसपा र नेकपा एसका आकांक्षी उम्मेदवारहरूले आफू नै टिकट पाउने दाबी गरिरहेका छन् । त्यसैले उनीहरूमध्ये चुनावी मैदानमा को उत्रने निश्चित छैन ।
यस पटक डा. सीके राउत नेतृत्वको जनमत पार्टीले पनि उम्मेदवार खडा गर्दैछ ।कुन नेता यो क्षेत्रबाट लड्ने भने अहिले फिक्स भएको छैन।तर उनका कार्यकर्ताहरु संगठन गाउँ गाउँमा निर्माण र विस्तार गरिएको जनमत पार्टीका धनुषाको क्षेत्र नम्बर २ का परिवेक्षक नवीन पण्डितले बताए।
कांग्रेसमा टिकट युद्ध !
यो क्षेत्रबाट चुनाव लड्न कांग्रेसका नेताहरूबीच टिकटका लागि दौडधुप चलिरहेको छ । कांग्रेसका रामकृष्ण यादव यही क्षेत्रबाट दुई पटक निर्वाचित भइसकेका छन् । ७० मा निर्वाचन जितेर गएपछि उनी कृषिमन्त्री बनेका थिए । ७४ मा तेस्रोपटक चुनाव लड्दा पराजित भएका उनी अहिले परिस्थिति बदलेको भन्दै टिकट पाए चुनाव जित्नेमा ढुक्क रहेको भन्दै लबिङमा छन् ।
केन्द्रीय समितिमा सबभन्दा बढी मत पाएर जितेकी मुक्ता यादव र पूर्वसांसद दिनेश प्रसैला पनि टिकटका दाबेदार छन् । ७० मा समानुपातिक सांसद बनेकी मुक्ता ०७४ मा राष्ट्रियसभा सदस्यमा विजयी भएकी थिइन् । दिनेश भने ०७० मा तत्कालीन क्षेत्र नम्वर १ बाट संविधानसभा सदस्यमा निर्वाचित भएका थिए ।
यो पटक गठबन्धन हुने भएकाले चुनाव जित्ने लगभग पक्का भएकाले टिकट पाउन मुक्ता र दिनेश पनि कसरत गरिरहेका छन् । तर, सत्ता गठबन्धनमा सीट बाँडफाँट भइनसकेकाले उम्मेदवारबारे अलमल छ ।
अब्बल अरगरिया
झण्डै १४ हजार मतान्तरले निर्वाचन जितेका अरगरिया अहिले पनि अरुका लागि चुनौती देखिन्छन् । आफूले जितेर गएपछि निर्वाचन क्षेत्रको शिक्षा, स्वास्थ्य र भौतिक पूर्वाधारको अवस्था सुधारेको दाबी गर्दै उनले मतदाताको साथ रहेकोले पुनः जित्ने दाबीसमेत गरे ।
एमालेमा ल्याउन केही शीर्ष नेता लागेपनि त्यो भने सम्भावना नरहेको अरगरियानिकट नेताहरू बताउँछन् ।
सो क्षेत्रमा एमालेबाट अहिले कोही पनि चुनाव लड्ने आकांक्षी देखिएका छैन । यद्यपि गंगाराम यादवको चर्चा छ । एमाले अध्यक्ष ओलीसँग नजिक मानिएका उनी लोसपाबाटै चुनाव लड्दा एमालेको साथ पाउनेमा ढुक्क छन् । सो क्षेत्रका एमाले नेताहरू पनि अरगरियाप्रति सकारात्मक रहेको छ।
