न्यूजमधेश डेस्क
दाङ,७ भाद्र। दाङको घोराहीमा एक टिपरका चालक र सहचालकले आफूहरूले चलाउँदै आएको टिपरमा आगजनी गरेको खुलेको छ।
घोराही उपमहानगरपालिका–३ मा मंगलबार बिहान रा १ ख १६९४ नम्बरको टिपरमा आगजनी भएको थियो।
मंगलबार नेत्रविक्रम चन्द ‘विप्लव’ नेतृत्वको नेकपाले बन्द आह्वान गरेकाले सुरुमा बन्दकर्ताले नै उक्त टिपरमा आगजनी गरेको अनुमान गरिएको थियो। तर, प्रहरीले अनुसन्धान गर्ने क्रममा टिपरका चालक र सहचालक नै आगजनीमा संलग्न रहेको खुलेको छ।
प्रहरीले टिपर चालक राप्ती गाउँपालिका–८ पिपरीका ३२ वर्षीय अरुण चौधरी र सहचालक गढवा गाउँपालिका–७, चन्दनपुरका १७ वर्षीय आकाश चौधरीलाई नियन्त्रणमा लिएको छ। उनीहरूले प्रहरीसामु आफैंले आगजनी गरेको स्वीकार गरेका छन्।
जिल्ला प्रहरी कार्यालय दाङका प्रमुख, एसपी सुरेशप्रसाद काफ्लेका अनुसार टिपर पुरानो भएको, पटक पटक बिग्रेर दु:ख दिने भएका कारण आगो लगाएको उनीहरूले बयान दिएका छन्। टिपरधनी घोराहीका थानेश्वर भण्डारी रहेको बताइएको छ।
