न्यूजमधेश डेस्क
जनकपुरधाम,१९ भदौ । आगामी प्रतिनिधिसभा निर्वाचनका लागि नेकपा एमाले, धनुषाले रघुवीर महासेठ र उनकी पत्नी जुली महासेठलाई छुट्टाछुट्टै क्षेत्रबाट उम्मेदवार सिफारिस गरेको छ ।
आइतबार बसेको क्षेत्रीय समितिको बैठकले रघुबीरको नाम धनुषा क्षेत्र नम्बर ४ बाट र जुलीको नाम धनुषा क्षेत्र नम्बर ३ बाट सिफारिस गरेको एमाले जिल्ला अध्यक्ष राजकिशोर यादवले जानकारी दिए । उनका अनुसार दुवैको नाम सर्वसम्मतले सिफारिस भएको छ ।
क्षेत्रीय समितिबाट भएको सिफारिस जिल्ला कमिटिमा आउने र यहाँबाट प्रदेश कमिटिमा पठाइने उनले बताए ।
पार्टीका केन्द्रीय सचिव र मधेश प्रदेशका इन्चार्ज समेत रहेका रघुबीर २०७४ को निर्वाचनमा धनुषा ४ बाट निर्वाचित भएका थिए ।
जुली सिफारिस भएको क्षेत्र नम्बर ३ मा यसअघि लोसपा नेता राजेन्द्र महतो निर्वाचित भएका थिए । महतो यस पटक पनि यहीं क्षेत्रबाट चुनाव लड्ने तयारी गर्दैछन् ।
