न्यूजमधेश डेस्क
काठमाडौं ,३ मङ्सिर । नेकपा (एमाले)का प्रदेशसभा उमेदवार नै पैसा बाँडेको आरोपमा पक्राउ परेपछि प्रहरी प्रभाग बूढानीलकण्ठमा तनाव उत्पन्न भएको छ ।
कांग्रेस समर्थक कार्यकर्ता वृत्तमा पुगेर दोषीमाथि कडा कारबाहीको माग गर्दै नाराबाजी गरिरहेका छन् । कांग्रेस कार्यकर्ता ठूलो संख्यामा उपस्थित भएर नाराबाजी गर्न थालेपछि सो क्षेत्रमा सुरक्षा बढाइएको छ ।
शुक्रबार साँझ मौन अवधिमा पैसा बाँडेको आरोपमा प्रहरीले काठमाडौं–५ को प्रदेशसभा ‘ख’का उमेदवार दीपक निरौलासहित तीनजनालाई पक्राउ गरेको थियो ।
पक्राउ पर्नेमा बूढानीलकण्ठ नगरपालिका–६ का वडाध्यक्ष रवि खड्का र एमालेको बुढानीलकण्ठ नगरपालिकाका अध्यक्ष प्रदीप डंगोल छन् ।
उनीहरू हात्तिगौंडास्थित युरो स्कुल नजिकैबाट पक्राउ परेका हुन् । उनीहरुले पैसा बाँड्न लागेको सुराक पाएपछि प्रहरीले पिछा गरेको थियो ।
काठमाडौं–५ बाट प्रतिनिधिसभामा प्रत्यक्षतर्फ एमाले वरिष्ठ उपाध्यक्ष ईश्वर पोखरेल चुनावी प्रतिस्पर्धामा छन् ।
पक्राउ परेका निरौला एमाले काठमाडौं जिल्ला कमिटीका अध्यक्षसमेत हुन् । पक्राउ परेकाहरुलाई प्रभागबाट महाराजगञ्ज वृत्त लगेर थप अनुसन्धान गरिने प्रहरीले जनाएको छ ।
