न्यूजमधेश डेस्क
सप्तरी, ४ मंसिर । सप्तरीको छिन्नमस्ता वार्ड नम्बर ७ मा पैसा लिन नमान्दा मतदाता कुटिएका छन् ।
गएराति १ बजेको समयमा छिन्नमस्ता ७ स्थित हाटीटोलमा पैसा लिन नमान्दा जसपा कार्यकर्ताबाट मतदाता कुटिएको हो ।
कुटपिटबाट ३ जना घाईते भएका छन् । घाईते हुनेहरुमा स्थानीय ४८ बर्षीया उषादेवी मंडल, ५१ बर्षीय सुकराम मंडल र १९ बर्षीय शुशील कुमार मंडल रहेका छन् । उनीहरुको उपचार गजेन्द्रनारायण सिंह अस्पताल राजविराजमा भईरहेको छ ।
यो घट्ना सामाजिक सञ्जाल फेसबुकमा सार्वजनिक भएको छ । मनोज विद्रोहीको फेसबुक एकाउन्टबाट सार्वजनिक गरिएको सो भिडियोमा पीड़ित उषाले पुर्व जिल्ला समन्वय समिति प्रमुख एवं जसपा नेता प्रभाकर यादवको निर्देशनमा आफूहरुलाई कुटपीट गरिएको बताएकी छिन् । प्रभाकर जसपाका नेता हुन् र उपेन्द्र यादव लाई जिताउन मत किन्न पुगेका थिए ।
“पैसा लिन नमान्दा मनोज भनिने प्रभाकर यादवको निर्देशनमा आफूहरुलाई सत्यनारायण यादव, दुर्गा यादव, जोगेन्द्र यादव र विरेन्द्र यादवले कुटेको छ” उनले भिडियोमा बोलेकी छिन् “मेरो मोवाइल र मंगसुत्र पनि हराएको छ ।” यस घट्ना बारे जिल्ला प्रहरी कार्यालय सप्तरीका प्रवक्ता लाई फोन गर्दा मोवाइल उठेन ।
यसअघि जसपा बाटै चुनाव जितेर विष्णुपुर गाउँपालिकाका अध्यक्ष भएका उमेशप्रसाद यादवले उपेन्द्र यादवलाई जिताउन मतदातालाई पैसा बाँड्दै गरेको भिडियो सामाजिक सञ्जालमा सार्वजनिक भएको थियो ।
