न्यूजमधेश डेस्क
जनकपुरधाम,२९ पौष।डा.सीके राउत नेतृत्वको जनमत पार्टीबाट मधेश प्रदेशमा नवनियुक्त मन्त्री ई. बसन्त कुशवाहाले सहिद परिवारलाई सम्मान गर्दै काम थाल्नी गर्नुभएको छ ।
शुक्रवार मन्त्री पदको सपथ लिएपछि उनले मधेश आन्दोलनको क्रममा मारिएका ब्रहमदेव ठाकुरका आमा मलिनिया देवीलाई सम्मान गरेर काम सुरु गरेका हुन् ।
जनमत पार्टीका प्रदेशसभा सदस्यहरु तथा पार्टीका नेताहरु सहित मन्त्री कुशवाहा गणेशमान चारनाथ नगरपालिका—१ स्थित छघरियामा रहेको उनको घरमै पुगेर दोसल्ला ओढाएर मलिनियालाई सम्मान गरेका छ्न ।
आर्थिक अवस्था दयनीय रहेको उनको परिवारलाई प्रदेश सरकारले हरसम्भव सहयोग गर्ने कुशवाहाले आश्वासन दिए । जनमत पार्टीले सहिद परिवारलाई पनि पहिलै प्राथमिकतामा राखेर काम गर्नेछ ।
२०६३ माघमा पूर्व–पश्चिम राजमार्गसँगै जोडिएको वीरेन्द्रबजार चोकमा प्रहरीले चलाएको गोली लागेर १७ वर्षीय ब्रह्मदेवको मृत्यु भएको थियो । मधेश आन्दोलनमा मारिएका उनी धनुषाका पहिलो सहिद हुन् ।
