न्यूजमधेश डेस्क
जनकपुरधाम ,१८ माघ। धनुषाको शहिदनगर नगरपालिका ७ धवौलीमा रहेको एस.एन.आर. जनता माविका प्रधानाध्यापक श्रीप्रसाद गोहिवारलाई विद्यार्थीहरुले दुव्र्यवहार गरेका छन् ।
पठनपान अस्तव्यस्त पारेको र करोडौं रुपैया भ्रष्टाचार गरेको भन्दै विद्यार्थीहरुले प्रधानाध्यापक गोहिबारमाथि कालो रंग फालेर दुव्र्यवहार गरेका हुन् । विद्यार्थीहरुले प्रधानाध्यापक गोहिवारमाथि कालो रंग दल्नुका साथै विद्यालयमा तालाबन्दी समेत गरेका छन् ।
पठनपाठन सुधार्न र हरहिसाव सार्वजनिक गर्न पटक पटक आग्रह गर्दा पनि वेवास्ता गरेपछि बाध्य भएर प्रधानाध्यापक गोहिवारमाथि कालोमोसो दलेको विद्यार्थी सुजित कुमार मण्डलले बताए ।
उनले भने, ‘यस्तो हेडसर हामीलाई चाहिदैन । विद्यालयमा कुनै नियम नै छैन । सरस्वती पूजामा घटना हुँदा पनि केहि गर्नुभएन ।’ भवन निर्माण, छात्तवृत्ति र पोशाक वितरण, कम्प्यूटर खरिद लगायतका शिर्षकमा प्रधानाध्यापक गोहिवारले करोडौं रुपैयाँ भ्रष्टाचार गरेको उनले आरोप लगाए ।
अर्का विद्यार्थी जयकिसन पासवानले कक्षाकोठा समेत सफा नहुने गरेको गुनासो गरे । उनले भने, ‘४÷५ दिन भयो लोखर्के (लुखी) मरेको । तर अहिलेसम्म क्लास सफा गरिएको छैन । गन्हाइरहेको छ ।’
उनले प्रधानाध्यापक गोविवार चरम लापरबाही गर्ने गरेकाले अर्को प्रधानाध्यापक नआएसम्म विद्यालयमा तालाबन्दी जारी राख्ने चेतावनी दिए । उनले छात्रवृत्ति वितरण र पाठ्यपुस्तकको भर्पाइ, धानबालीबाट भएको आम्दानी र खर्च विवरण, खाजा व्यवस्थापन खर्चको विवरण लगायत सबै हरहिसाव सार्वजनिक गर्नुपर्ने पनि माग गरे ।
प्रधानाध्यापक गोहिवारमाथि अभिभावकहरु पनि आक्रोश पोखेका छन् । अभिभावक दिपेश यादव भन्छन्, ‘उहाँ (प्रधानाध्यापक) आएदेखि अहिलेसम्म अभिभावक भेला गर्नुभएको छैन । यो विद्यालयमा उहाँले चरम लापरबाही गर्नुभएको छ । त्यसैले विद्यार्थीहरुले गरेको कारबाही सही हो ।’
अभिभावक यादवले पनि सरकारले बालबालिकाका लागि खाजाको व्यवस्था गरिए पनि प्रधानाध्यापक गोहिवारले कहिल्यै खाजा नखुवाएको बताए । उनले विद्यालयको रुख विरुवाहरु अनाधिकृत रुपमा कटान गरी रुपैयाँ चलाएको पनि प्रधनाध्यापक गोहिवारमाथि आरोप लगाए ।
