न्यूजमधेश डेस्क
जनकपुरधाम,२० माघ । कार्यभार सम्हालेको तीन साता बितिसक्दा पनि मधेस प्रदेशका मुख्यमन्त्री सरोजकुमार यादव सरकारी निवासमा सरेका छैनन् ।
निवास रङ्गरोगनको काम सम्पन्न नभएकोले नियुक्त भएको तीन सातासम्म पनि मुख्यमन्त्री यादव सरकारी निवासमा सर्न पाएका छैनन ।
पुष २७ मा नियुक्त भएका उनी सरकारी निवासमा नगई राजधानी जनकपुरधामस्थित एक होटेलमा बास बसिरहेका छन् । मुख्यमन्त्री यादव जनकपुरधामस्थित होटेल वेलकममा बसिरहेका छन् ।
पुस २७ मा मुख्यमन्त्री नियुक्त भएका यादवले दुईदिन पछि २९ पुषमा तीन मन्त्रीसहित शपथ ग्रहण गरेका थिए । सुरुमा मन्त्रीहरुलाई बिना विभागीय बनाइए पनि पछि उनीहरूको जिम्मेवारी तोकिएको थियो । १० सदस्यीय मन्त्रिमण्डल रहने मधेस प्रदेशमा मन्त्रीपरिषदले हालसम्म पुर्णता पाउन सकेको छैन ।
जनकपुर चुरोट कारखाना परिसरभित्र मुख्यमन्त्री तथा मन्त्रीपरिषद्को कार्यालय र मुख्यमन्त्री तथा मन्त्रीहरुको निवास रहेको छ । मुख्यमन्त्री बस्ने सरकारी निवासमा रङ्गरोगनको कार्य चलिरहेकोले उनी त्यहाँ नसरेको बताइएको छ । मन्त्रीहरु भने सरकारी निवासमा सरिसकेका छन् ।
यादवले २९ पुषमा सपथ लिएका थिए भने ४ माघमा बसेको प्रदेश सभाको बैठकबाट मुख्यमन्त्री यादवले विश्वासको मत प्राप्त गरेका थिए । मुख्यमन्त्री यादवलाई १०२ जना प्रदेशसभा सदस्यले विश्वासको मत दिएका थिए । मुख्यमन्त्री नियुक्त भएको नवौँ दिनमा उनले विश्वासको मत पाएका थिए । यादवले प्रदेश सभाको दोस्रो ठूलो दल नेपाली कांग्रेसको पनि विश्वासको मत प्राप्त गरे ।
मुख्यमन्त्री यादवलाई प्रदेश सभामा प्रतिनिधित्व गर्ने सबै दलले विश्वासको मत दिएका थिए ।
