न्यूजमधेश डेस्क
जनकपुरधाम,२९ माघ । पुर्वी धनुषाको जनकनन्दिनी गाउँपालिकादेखि धनुषाको शहिदनगर नगरपालिकासम्म कालोपत्रे सडक कार्य थाल्नी गरेको छ।
जनकनन्दिनी गाउँपालिका वडा नम्बर १ इनर्वा मल्हनीयाँदेखि शहिदनगर नगरपालिकाको वडा नं. ३ यदुकूहासम्म कालोपत्रे सडकको शनिबार एक कार्यक्रमबीच शिलान्यास गरिएको छ ।
जनकनन्दिनी गाउँपालिकाका अध्यक्ष दिपिनदेव यादवले शनिबार बन्न लागेको कालोपत्रे सडकको शिलान्यास गरेका हुन् । पूर्वी सीमावर्ती क्षेत्रमा गाउँ–गाउँ जोडने पहिलो पटक कालोपत्रे सडक निर्माण हुन लागेको हो ।
जनकनन्दिनी गाउँपालिकाको वडा नं. १ मै पर्ने सीमावर्ती गाउँ इनर्वादेखि मल्हनीया–फुलबरिया–बनरझुला–साघारा चोक हुँदै टरिया लक्कड–सखुवा मडान तथा नरहा नाथपट्टि हुँदै ताराटोल–यदुकूहा बजारसम्म ८ किलोमिटरको कालोपत्रे सडक निर्माण हुन लागेको हो ।
लक्ष्मणरेखा नामक कन्सट्रक्सन कम्पनीलाई परेको सो ठेक्काको प्राथमिक लागत १२ करोड रुपैयाँ रहेको छ ।आज आइतबारदेखि नै कालोपत्रेको कार्य सुरु हुने जनकनन्दिनी गाउँपालिकाका अध्यक्ष दिपिनदेव यादवले जानकारी दिए ।
