न्यूजमधेश डेस्क
जनकपुरधाम ,२३ बैशाख।धनुषाको जनकनन्दिनी गाउँपालिकामा प्रथम पटक गाउँपालिकास्तरीय बजेटबाट कालोपत्रे सडक बन्न सुरु भएको छ ।
शनिबार एक कार्यक्रमबीच गाउँपालिका वडा नं. ६ कठालको बौसी टोलस्थित सडकको शिलान्यास गरेको हो । गाउँपालिका अध्यक्ष दिपिन देव यादव, उपाध्यक्ष कमला सहगल र वडा नं. ६ का वडाध्यक्ष सूर्यदेव यादवले सँयुक्त रुपमा सडक शिलान्यास गरेका छन् ।
जनकनन्दिनी गाउँपालिको आर्थिक लगानीमा गाउँपालिका अध्यक्ष दिपिन देव यादवले कालोपत्रे सडक बनाउन पहल गरेका थिए । गाउँपालिकास्तरबाट प्रथम पटक सो गाउँपालिकामा पीच सडक निर्माण हुन लागेको हो ।
गत बैशाख ११ गते टेन्डर निकाल्दै जनकनन्दिनी गाउँपालिकाले २ किलोमिटर भन्दा अधिक लामो बन्न लागेको कालोपत्रे सडकको लागि राजदेवी आदर्श जेभि कम्पनीलाई ठेक्का परेको हो ।
कमला नदीस्थित निर्माणधीन रहेको झोलुँगे पुलको सडक सँजालसँग जोडदै कठाल टोलको वडा कार्यालयसम्म तत्कालै पीच सडक बन्ने भएको छ । जसको लागि गाउँपालिकाले ३ करोड २० लाख रुपैयाँ विनियोजन गरेको छ ।
शिलान्यासको लागि वडा नं. १ का वडाध्यक्ष सँतोष गोईत, वडा नं. २ का वडाध्यक्ष अब्दुल मालिक “रखु”, वडा नं. ३ का वडाध्यक्ष विष्णुदेव साह, वडा नं. ४ का वडाध्यक्ष दिलीप यादव, वडा नं. ५ का वडाध्यक्ष अशोक मण्डल वडा नं. ६ का वडाध्यक्ष सूर्यदेव यादवसहित सबै वडाका वडासदस्यहरु, प्राविधिक शाखाका मुकेश कुमार मण्डलसहित स्थानीय बुद्धिजीवी, समाजसेवीहरुको सहभागीता रहेको थियो ।
