जनकपुरधाम । जनकपुरधाम उपमहानगरपालिका -९ स्थित घरमा झुण्डिएको अवस्थामा फेला परेकी महिलाको हत्या दाइजोको निहुँमा भएको आरोप लागेको छ ।
आईतवार बेलुका २२ वर्षीया आरतीको साहको शव झुण्डिएको अवस्थामा फेला परेको थियो । उनलाई तत्कालै काब्या अस्पताल लगियो । तर अस्पतालले उनको मृत्यू भइसकेको जनाएपछि शव पोष्टर्माटका लागि प्रादेशिक अस्पताल पुर्याइयो ।
आरतीको शवको अहिले पनि अस्पतालमै छ । माइत पक्षले उनी आत्महत्या नगरेको दावी गरेको छ । माइत पक्षको आरोप छ– दाइजोको निहुँमा श्रीमान, देबर, सासु र ससुराबाटै भएको हो ।
दुई वर्ष अगाडी सामाजिक परम्परा अनुसार आरतीको विवाह मिथिला विहारी नगरपालिका ३ का मोतीबाबु साहसँग भएको थियो ।
आरतीको हत्या दाइजोकै निहुँमा भएको उनका बुवा नगराइन नगरपालिका ८ का विनोद प्रसाद साहको आरोप छ । उनले जिल्ला प्रहरी कार्यालय धनुषामा आरतीको हत्या गरेको भन्दै उनका श्रीमान मोतीबाबु, देबर रवि, ससुरा मोहन र सासु रेणुमाथि किटानी जाहेरी दिएका छन् ।
प्रहरीले अहिले उजुरी दर्ता गरेको छैन । उनले उजुरीमा छोरी आरतीको विवाहमा २५ लाख रुपैयाँ खर्च गरेको दावी गर्दै भनेका छन्– थप दाइजोका लागि पटक पटक यातना दिदै आएको थियो । तर आफू एक न एक दिन सब ठिक हुन्छ भन्ने आशामा बसेको थिए ।
आरतीको शरिरको विभिन्न भागमा निलडाम देखेपछि घटनास्थल पुगेको र त्यहाँ पुग्दा कुटपिट गरी ज्यान मारेको स्थानीयबाट खुल्न आएको दावी उजुरीमा गरिएको छ ।
यता, धनुषाका प्रहरी प्रवक्ता वेदप्रसाद गौतमले आरतीको शव झुण्डिएको अवस्थामा फेला परेको र अहिले थप अनुसन्धान भइरहेको बताए । उनका अनुसार माइत पक्षले दाइजोको निहुँमा हत्या भएको भनेर जाहेरी पनि दिएको छ । तर पोष्टमार्टमको रिपोर्ट आएपछि मात्रै यर्थात् खुल्छ ।
