जनकपुरधाम,३० असार। मधेस प्रदेशमा समायोजन भई आएका निजामती कर्मचारीसम्बन्धी सम्पूर्ण कार्य प्रदेशबाटै हुने भएको छ । प्रदेशका निजामती कर्मचारीहरूको अध्यावधिक गर्न मुख्यमन्त्री तथा मन्त्रिपरिषद कार्यालय मातहत रहने गरी प्रदेश निजामती किताब खानाको स्थापना गरिएको छ ।
राष्ट्रिय किताब खानाले कर्मचारीहरूको आध्यावधिक गर्दै आएकोमा अव मधेस प्रदेशमा आएका कर्मचारीहरूको सम्पूर्ण विवरण रहेको पीआईएस पोर्टलको संचालनका लागि बुधबार एक कार्यक्रमका बीच प्रदेश सरकारलाई जिम्मेवारी हस्तारण गरिएको छ । पोर्टल हस्तान्तरण कार्यक्रमलाई सम्बोधन गर्दै प्रदेश प्रमुख हरिशंकर मिश्रले यसले प्रदेशमा निजामती कर्मचारीको सञ्चालन तथा व्यवस्थापनमा सहयोग पुग्नुका साथै विवरण लिन काठमाडौँ जानुपर्ने बाध्यताको अन्त्य हुने बताए ।
मधेस प्रदेशका मुख्यमन्त्री सरोजकुमार यादवले निजामती किताब खानाले मधेस प्रदेशमा वैज्ञानिक सूचना प्रणालीको हस्तान्तरणले निजामती कर्मचारीको सम्पूर्ण विवरण प्रदेशमा नै सुरक्षित रहने बताए । मधेस प्रदेश सरकारले एक महिनाभित्रमा स्थानीय तहको विधेयक प्रदेशबाट पारित गरेर प्रदेशमा रिक्त रहेको दरबन्दीमा प्रदेश लोकसेवा आयोगमार्फत कर्मचारी भर्ना गराउने पक्षमा सरकार रहेको बताए ।
कार्यक्रममा प्रदेश प्रदेशका निमित प्रमुख सचिव किशोरकुमार चौधरीले उक्त पोर्टलको सञ्चालनले मधेस प्रदेशमा निजामती कर्मचारी तथा स्थानीय तहमा खटेका निजामती कर्मचारीहरूको सेवामा सुधार आउने बताए । पीआईएस प्रणालीले कर्मचारीहरूको नियुक्तिदेखिको सम्पूर्ण विवरणहरू समावेश र सुरक्षित रहने बताउँदै पोर्टलले सूचना क्यानको रुपमा काम गर्ने उनको भनाइ थियो ।
कर्मचारीको सम्पत्ति विवरण,अवकासको समय, सरुवा बढुवा अव सबै प्रदेशबाटै हुने उनले बताए ।
