काठमाडौँ ,४ साउन। जनमत पार्टीले पार्टीको नीति नियम अनुसार नचलेको आरोपमा पाँच नेतालाई कारबाही गरेको छ ।
कारबाहीमा पर्नेमा बाराका नेता शिवचन्द्र कुशवाहाले अनुशासनहिनता प्रदर्शन गर्दै पार्टी र नेतृत्व विरुद्ध लागेको भन्दै उनलाई पार्टीको साधारण सदस्यसमेत नरहने गरी पार्टीले कारबाही गरिएको छ ।
त्यस्तै सप्तरीका जनमत पार्टीका नेता गुलाब मण्डल मन्दिरको व्यवस्थापन समितिको निर्वाचनमा बागी उम्मेदवार बनेर असहयोग गरेको भन्दै उनलाई पार्टीको सदस्यबाट एक वर्षका लागि निलम्बन गरेको छ ।
कारबाहीमा परेका शङ्कर खड्का जनमत पार्टीका स्थानीय कार्यकर्ता थिए । उनले विद्यालय व्यवस्थापन समितिको निर्वाचनमा बागी उम्मेदवार बनेर असहयोग गरेको भन्दै उनलाई पनि एक वर्षका लागि पार्टीको सदस्यबाट निलम्बन गरिएको छ ।
सचिवालय सदस्य समेत रहेका भोपेन्द्र यादव (रुपन्देही)ले पार्टीको केन्द्रीय निर्देशन उल्लङ्घन गरेको र गर्न लगाएको तथा पार्टीभित्र गुटबन्दी गरेको भन्दै उनलाई केन्द्रीय सचिवालयबाट तीन महिनाका लागि निलम्बन गरेको छ भने कपिलवस्तुका भगवान् दास यादवलाई पनि पार्टीको सदस्यबाट एक वर्षका लागि निलम्बन गरेको छ । उनले पार्टीको बैठकहरू र कामकारबाहीको क्रममा हो हल्ला गर्दै अनुशासनहीनताको काम पटक पटक गरेको भन्दै उनलाई कारबाही गरिएको जनमतले जनाएको छ ।
अनुशासन समितिका प्रमुख दीपकुमार साहले पार्टीको विधान, नियम, नीति तथा निर्देश विपरीत जाने छुट कसैलाई नरहेको बताए ।
छानबिन समितिले दिएको प्रतिवेदन र गरेको सिफारिसका आधारमा उनीहरूलाई कारबाही गरिएको उनले बताए ।
