पर्सा ,२७ साउन। ठोरी गाउँपालिकाबाट प्रहरीले लागूऔषधसहित २ जनालाई पक्राउ गरेको छ । शुक्रबार दिउँसो सवा १२ बजेको समयमा ठोरी गाउँपालिका–५ सुवर्णपुर वर्णमाला स्कुल नजिकबाट उनीहरुलाई पक्राउ गरिएको हो ।
प्रहरी चौकी सुवर्णपुर र प्रहरी चौकी महादेवपट्टीबाट खटिएको संयुक्त टोलीले जाँच गर्ने क्रममा शंकास्पद रुपमा भारतबाट नेपालको सुवर्णपुर बजारतर्फ आउँदै गरेका ठोरी गाउँपालिका–३ का १९ वर्षीय सचिन लामा र १६ वर्षीय किशोर पक्राउ परेका हुन् । उनीहरुले बोकेको कपडाको झोलाबाट प्रतिबन्धित लागूऔषध नाइट्राभेट १० लेखिएको नाइट्राजेपाम ३ सय १४ पिस ट्याबलेट फेला परेको थियो ।
१६ वर्षीय किशोरले लगाएको ज्याकेटको खल्तीमा लागूऔषध गाँजाजस्तो देखिने वस्तु ५० ग्राम फेला परेकोले दुवै जनालाई नियन्त्रणमा लिई अनुसन्धान गरिरहेको जिल्ला प्रहरी कार्यालय प्रवक्ता डीएसपी दीपक गिरीले जानकारी दिए ।
