काठमाडौं,१ भाद्र । संघीय संसद्मा जारी गतिरोध अन्त्य गर्ने विषयमा सभामुख देवराज घिमिरेले प्रधानमन्त्री पुष्पकमल दाहाल प्रचण्डसँग छलफल गर्दैछन्।
सभामुखले प्रधानमन्त्री प्रचण्डलाई सरकारी निवास बालुवाटारमा भेटेर संसद्मा जारी अवरोध र त्यसको समाधानका विषयमा छलफल गर्न लागेका हुन्। २ नेताबीच शुक्रबार बिहान ९ बजेपछि भेटवार्ता गर्ने तय भएको छ।
त्रिभुवन अन्तर्राष्ट्रिय विमानस्थलको भन्सारबाट जाँचपास भएर भित्रिएको तस्करीको ६० किलो सुन प्रकरणको छानबिनका लागि उच्चस्तरीय समिति गठनको माग गर्दै प्रमुख प्रतिपक्षी दल नेकपा एमालेले संघीय संसद्का दुवै सदन (प्रतिनिधि सभा र राष्ट्रिय सभा)मा अवरोध पुर्याउँदै आएको छ।
एमालेको अवरोधका कारण साउन १० गते यता दुवै सदनका बैठक नियमित कार्यसूचीमा प्रवेश गर्न सकेका छैनन्।
पछिल्लो समय सदनमा एमालेले गरिरहेको अवरोधसँग सभामुख घिमिरेको भूमिकालाई लिएर समेत प्रश्न उठ्ने गरेको छ। संसद्को चौथो ठूलो दल राष्ट्रिय स्वतन्त्र पार्टीले सभामुख घिमिरेको भूमिका निष्पक्ष नभएको र उनले दलीय (एमालेप्रति) पक्षधरता देखाएको भन्दै सार्वजनिक असन्तुष्टि जाहेर गरेको छ।
