काठमाडौं । करिब ६० किलो सुन तस्करीमा त्रिभुवन अन्तर्राष्ट्रिय विमानस्थलस्थित भन्सार कार्यालयका कर्मचारीसँग सुन तस्करको सेटिङ पुष्टि भएको छ । अनुसन्धानको क्रममा तस्करलाई सघाएको खुलेपछि प्रहरीले थप तीन भन्सार कर्मचारीलाई पक्राउ गरेको छ ।
प्रहरीको केन्द्रीय अनुसन्धान ब्यूरो(सिआइबी)ले शुक्रबार भन्सार अधिकृत पुष्पा जोशी तथा नायब सुब्बाहरू कमल परियार र वीरेन्द्र नेपालीलाई पक्राउ गरेको हो । यसअघि पक्राउ परेका कर्मचारी तथा बिचौलियामाथिको अनुसन्धानमा उनीहरुको पनि संलग्नता पुष्टि भएको हो । भन्सारका थप कर्मचारी पक्राउ परेसँगै यस प्रकरणमा पक्राउ पर्नेको संख्या ३० पुगेको प्रहरी प्रवक्ता डिआइजी कुबेर कडायतले बताए । यसअघि भन्सारका चार कर्मचारीलाई सिआइबीले पक्राउ गरिसकेको छ ।
भन्सारबाट बाहिरिएको करिब ६० किलो सुन गत २ साउनमा राजश्व अनुसन्धान विभागले बरामद गरेको थियो । विभागले करिब तीन सातापछि अनुसन्धानको जिम्मा सिआइबीलाई दिएकोमा सिआइबीले संगठित अपराध सम्बन्धि कसुरमा अनुसन्धान गरिरहेको छ ।
हङकङबाट ल्याइएको ब्रेक शु लगायत सामानभित्र लुकाएर सुन तस्करी भएको थियो । भन्सारको जाँचमा शंकास्पद देखिएपछि ती सामान पुन जाँच गर्नका लागि लेख्दा पनि कर्मचारीले जाँच नगरी पास गरेका थिए । जस आधारमा यसमा भन्सारका कर्मचारीको सेटिङ देखिएको हो । यसमा भन्सार एजेन्टहरु समेत पक्राउ परेका छन् ।
सुन तस्करीमा चिनियाँ बाहेकको गिरोहको संलग्नता खुल्न सकेको छैन । चिनियाँ गिरोहलाई नेपालमा सघाउने किशोर बस्नेत मुख्य व्यक्ति हुन् । उनले नै भन्सारमा सेटिङ मिलाएको प्रहरी स्रोत बताउँछ । बस्नेतलाई प्रहरीले भारतबाट पक्राउ गरी ल्याएको हो ।
यस प्रकरणमा सिआइबीले एक साताभित्र अनुसन्धान सकाएर जिल्ला सरकारी वकिल कार्यालयमा प्रतिवेदन बुझाउने तयारी गरेको छ । संगठित अपराध निवारण ऐन २०७० अनुसार यस्तो मुद्दामा ६० दिनसम्म मात्र थुनामा राखेर अनुसन्धान गर्न पाइन्छ । जसअनुसार आगामी ३० भदौभित्र मुद्दा दर्ता गरिसक्नुपर्ने हुन्छ ।
