जनकपुरधाम । धनुषाको शहिदनगर नगरपालिकाको हठ्ठिपुरस्थित रहेको मंगलेश्वर महादेव मन्दिरको संस्थापक कृषिविज्ञ डा. सत्यनारायण यादव भदिसवारको १३ औं दिनको पुण्यतिथिका अवसरमा श्रद्धाञ्जली सभा सम्पन्न भएको छ।
शुक्रबार मंगलेश्वर महादेव मन्दिरको प्राङ्गणमा आयोजित श्रद्धाञ्जली सभामा सिंगो हठ्ठिपुरका महिला पुरुष बालबालिका बृद्धसहितले डा. भदिसवारको फोटोमाथि फूल अबिर चढाई श्रद्धाञ्जली अर्पण गरे । सोही क्रममा उहाँको श्रीमती र छोरा शिवशंकर यादवसहित स-परिवारले उहाँलाई स्मरण गर्दै सभाको शुरुवात गरे ।
कार्यक्रममा सहभागीहरुले मंगलेश्वर महादेव मन्दिरको संस्थापक कृषिविज्ञ डा. भदिसवारको निधनले आफ्ना अभिभावक गुमाएको बताए । उहाँहरुले डा. भदिसवारले समाज परिवर्तनमा गरेका सराहनीय कार्यहरुलाई स्मरण गर्दै नाम अमर भएको बताए ।
सरकारले गर्न नसक्ने कार्यहरु डा. भदिसवारले गरि इतिहास रचेको सभाका सहभागीहरुले धारणा राखे । करोडौंको लगानीमा मंगलेश्वर महादेवको मन्दिर निर्माण गरेको जसबाट उनको नाम अमर भएको बताए । उनको सहयोगमा सयौं जना विद्यार्थीहरु आज डाक्टर, इन्जिनियर बनेको छ । अझै सयौं जना विद्यार्थीहरु अध्ययनको क्रममै छ । जसको कारण डा. भदिसवार हाम्रो गाउँ हठ्ठिपुरका शान रहेको थियो । उनको योगदानले दिनहु बाहिरका मानिसहरुले हाम्रो गाउँमा मंगलेश्वर महादेवको दर्शन गर्न आउँछन् । जसबाट हाम्रो गाउँको नाम देश विदेशमा पनि प्रख्यात भएको छ ।
मंगलेश्वर महादेव मन्दिरको परिकल्पनाकार संस्थापक कृषिवीज्ञ डा.सत्यनारायण यादव भदिसवारको ६५ वर्षको उमेरमा भाद्र १८ गते अमेरीकामा निधन भएको थियो । उनी ४५ वर्षदेखि अमिरेकामा बस्दै आएका थिए । उनको श्रीमती ,छोरा शिव शंकर यादव भदिसवार र दुई छोरी छन् ।
उनीहरु पनि अमेरीकामै बस्दै आएका छन् । छोरा शिवशंकरले दागबत्ती लिएका थिए । उहाँको अन्तिम संस्कार अमिरेकामै गरिए पनि काज किरिया जन्मधर्तीमै सम्पन्न गरिएको हो ।
