जनकपुरधाम । सामुदायिक विद्यालयका शिक्षकहरु आन्दोलन गर्न काठमाडौं पुगेपछि मधेश प्रदेशमा पनि पठनपाठन प्रभावित बनेको छ । यस प्रदेशका अधिकांश सामुदायिक विद्यालय दुई दिनदेखि ठप्प छ ।
शिक्षकको आन्दोलनमा मधेश सरकारको समर्थन छ । हुन त मुख्यमन्त्री सरोज कुमार यादवले शिक्षकका आन्दोलनबारे अहिलेसम्म आधिकारिक धारणा सार्वजनिक गरेका छैन । मधेश प्रदेशका शिक्षा तथा समाज कल्याण मन्त्री महेश प्रसाद यादवले भने आन्दोलित शिक्षकहरुको माग पुरा गर्नुपर्ने बताउँछन् ।
मन्त्री यादवले भने, ‘संघीय संसदमा दर्ता भएको विद्यालय शिक्षा विधेयकले समस्या उत्पन्न हुन्छ । शिक्षकका आन्दोलनलाई सरकारले गम्भीर रुपमा लिएर समस्या सम्बोधन गर्नुपर्छ ।’
विद्यालय बन्द गरी आन्दोलन गर्न नहुने हो तर सबै शिक्षक काठमाडौं गएपछि पठनपाठन प्रभावित बनेकोमा उनले दुःख व्यक्त गरे । उनले शिक्षकहरुसँग अविलम्ब वार्ता गरी आन्दोलनको अन्त्य गरी पठनपाठन सूचारु गर्नुपर्ने बताए ।
उनका अनुसार मधेश प्रदेशमा करिब १ हजार बढी सामुदायिक विद्यालय छन् ।‘शिक्षक नै नभएपछि कसरी पठनपाठन हुन्छ ?’, उनले भने, ‘प्रायः सबै विद्यालय ठप्प छन् ।
मधेश सरकारकै गृह, संचार तथा कानून मन्त्री मो. समिमले पनि शिक्षक–कर्मचारीका मागहरु सम्बोधन गर्न सरकारसँग माग गरेका छन् ।
उनले विज्ञप्ति जारी गरेर शिक्षक-कर्मचारीका मागहरु सम्बोधन गरी तत्काल सार्वजनिक शिक्षा क्षेत्र निरन्तर सूचारु गर्ने वातावरण सिर्जना गर्न सरकारसँग माग गरेका हुन् ।
उनले भनेका छन्- संसदमा पेश भएको शिक्षा ऐनका स्थानीय सरकार, प्रदेश सरकार र संघीय सरकारको स्पष्ट नीति सम्बोधन हुनेगरी शिक्षकहरुको जायज माग र आन्दोलनलाई समर्थन गर्दै जायज माग पुरा गर्न संसद र नेपाल सरकारसँग हार्दिक अनुरोध गर्दछु ।’
