सुमित मिश्र ,जनकपुरधाम।प्रधानमन्त्री केपी शर्मा ओलीको स्वास्थ्य लाभको कामना गर्दै धनुषाको टिल्हीमा हनुमान अराधना र यज्ञ आयोजना गरिएको छ ।
स्वास्थ्यमा गम्भिर समस्या देखिएपछि दुई पटकमा गरी करिब एक महिनासम्म सिंगापुरमा उपचार गराएर फर्केका ओलीको दिर्घायु र स्वास्थ्य लाभका लागि धार्मिक कार्यक्रम आयोजना गरिएको नेकपा नेता गंगाराम यादवले बताए । उनले गाउँलेको अनुरोधपछि धार्मिक कार्यक्रम आयोजना गरी प्रधानमन्त्रीको स्वास्थ्य लाभको लागि प्रार्थना गरेको जानकारी दिए ।
टिल्हीमा हनुमान अराधना, हवन र यज्ञको आयोजना गरी प्रधानमन्त्रीको स्वास्थ्य लाभको लागि प्रार्थना गरिएको यादवले बताए । उनले भने, ‘देशका प्रधानमन्त्री बिरामी परेको बेला सम्पूर्ण देशबासी चिन्तित छन् ।’ यस्तो अवस्थामा उनको दिर्घायुको लागि प्रार्थना गरिएको उनले बताए । कार्यक्रममा राष्ट्रपति तराई मधेश चुरे संरक्षण विकास समितिका अध्यक्ष विरेन्द्र यादव, धनुषाका एसपी शेखर खनाल र सशस्त्र प्रहरीका एसपी राजु उप्रेति लगायत सयौंको संख्यामा गाउँलेको सहभागिता थियो ।
